അടിമുടി മാറ്റവുമായി വാട്സ്‌ആപ്പ്. കുഴപ്പം പിടിച്ച സന്ദേശങ്ങള്‍ നീക്കം ചെയ്യാനുള്ള അധികാരം ഇനി മുതല്‍ അഡ്മിനു നല്‍കുന്നതടക്കമുള്ള മാറ്റങ്ങളാണ് പുതുതായി വരുന്നത്. ഗ്രൂപ്പ് അംഗങ്ങളുടെ പരമാവധി എണ്ണം ഇപ്പോഴത്തേതിന്റെ ഇരട്ടിയാകും. പുതിയ അപ്ഡേറ്റ് വരുന്നതോടെ ഒരു സിനിമ മുഴുവന്‍ വാട്സാപ്പിലൂടെ അയയ്ക്കാം.
ഉപയോക്താക്കള്‍ കാലങ്ങളായി ആവശ്യപ്പെട്ടുകൊണ്ടിരിക്കുന്ന ഈ സൗകര്യങ്ങള്‍ വരുന്ന ആഴ്ചകളില്‍ വിവിധ ഘട്ടങ്ങളിലായി ലഭ്യമായിത്തുടങ്ങും. ഓരോ സന്ദേശത്തിനും ഇമോജികള്‍ വഴി, സന്ദേശത്തിനുള്ളില്‍ തന്നെ പ്രതികരിക്കാവുന്ന ‘ഇമോജി റിയാക്‌ഷന്‍സ്’ ആണ് ഏറ്റവും ഒടുവിലത്തെ അപ്ഡേറ്റില്‍ ലഭ്യമാക്കിയിട്ടുള്ള സൗകര്യം.
നിലവില് ഒരു ഗ്രൂപ്പില്‍ 256 അംഗങ്ങളെയാണ് ഉള്‍പ്പെടുത്താന്‍ സാധിക്കുന്നത്. ഇത് 512 ആയി വര്‍ധിക്കും. ഗ്രൂപ്പിലെ അംഗങ്ങള്‍ അനാവശ്യമായ കാര്യങ്ങള്‍ പോസ്റ്റ് ചെയ്താല്‍ അഡ്മിന് തന്നെ മെസേജില്‍ അമര്‍ത്തിപ്പിടിച്ച്‌ ഡിലീറ്റ് ചെയ്യാം. വോയ്സ് കോളില്‍ ഒരേസമയം 32 പേരെ വരെ ചേര്‍ക്കാം.
രണ്ട് ജിബി വരെ വലുപ്പമുള്ള ഫയലുകള്‍ ഒറ്റത്തവണ അയയ്ക്കാം. നിലവില് 100 എംബി വരെ വലുപ്പമുള്ള ഫയലുകളാണ് അയയ്ക്കാനാവുക. പരിധി ഉയരുന്നതോടെ ഒരു സിനിമ പൂര്‍ണമായി അയയ്ക്കാനാവും.
