ആലപ്പുഴ: കേരള കൗമുദിയുടെ 115-ാം വാർഷികാഘോഷത്തിൽ ഉപരാഷ്ട്രപതി സി.പി. രാധാകൃഷ്ണൻ പങ്കെടുത്തു. 115 വർഷത്തെ കേരള കൗമുദിയുടെ യാത്ര പൊതുവിശ്വാസത്തിൻ്റെയും ധൈര്യത്തിൻ്റെയും ആശയങ്ങളുടെ ശക്തിയുടെയും തെളിവാണെന്ന് അദ്ദേഹം പറഞ്ഞു.
1911ൽ സി.വി. കുഞ്ഞിരാമൻ സ്ഥാപിച്ച കേരള കൗമുദി സാമൂഹിക ഉണർവിനും പാർശ്വവത്കരിക്കപ്പെട്ടവരുടെയും അടിച്ചമർത്തപ്പെട്ടവരുടെയും ശബ്ദമുയർത്തുന്നതിനും നിർണായക സംഭാവന നൽകിയെന്നും അദ്ദേഹം ചൂണ്ടിക്കാട്ടി.
അച്ചടി മാധ്യമങ്ങളിൽ നിന്ന് ടെലിവിഷൻ, ഡിജിറ്റൽ പ്ലാറ്റ്ഫോമുകൾ, സമൂഹമാധ്യമങ്ങൾ, നിർമിതബുദ്ധി എന്നിവയിലേക്കുള്ള മാറ്റങ്ങൾക്കിടയിലും വിശ്വാസ്യത, കൃത്യത, നീതി, സ്വാതന്ത്ര്യം, മാധ്യമധാർമികത എന്നിവയ്ക്ക് പ്രാധാന്യം നൽകണമെന്ന് ഉപരാഷ്ട്രപതി പറഞ്ഞു.
ശാസ്ത്ര-സാങ്കേതിക നേട്ടങ്ങൾ, നൂതന ആശയങ്ങൾ, സാമൂഹിക സേവനം, ക്രിയാത്മകമായ മാറ്റങ്ങൾ എന്നിവയ്ക്ക് പ്രാധാന്യം നൽകുന്ന നിർമാണാത്മക മാധ്യമപ്രവർത്തനമാണ് ആവശ്യമെന്നും അദ്ദേഹം പറഞ്ഞു. വികസനവും പരിസ്ഥിതി സംരക്ഷണവും സന്തുലിതമായി മുന്നോട്ടുകൊണ്ടുപോകണമെന്നും രാധാകൃഷ്ണൻ അഭിപ്രായപ്പെട്ടു.
ചടങ്ങിൽ കേരള കൗമുദി എക്സലൻസ് പുരസ്കാരങ്ങളും ഉപരാഷ്ട്രപതി വിതരണം ചെയ്തു. ഗവർണർ രാജേന്ദ്ര വിശ്വനാഥ് ആർലേക്കർ ഉൾപ്പെടെയുള്ള പ്രമുഖർ ചടങ്ങിൽ പങ്കെടുത്തു.
