തെഹ്റാൻ: അമേരിക്കയും ഇസ്രയേലും ഇറാന്റെ നിയമാനുസൃത അവകാശങ്ങൾ അംഗീകരിച്ചാൽ മേഖലയിലെ സമാധാനം പുനഃസ്ഥാപിക്കാൻ തയ്യാറാണെന്ന് ഇറാൻ പ്രസിഡൻറ് മസൂദ് പെസഷ്കിയാൻ അറിയിച്ചു. നിലവിലെ സംഘർഷം അവസാനിപ്പിക്കാൻ മൂന്ന് പ്രധാന നിബന്ധനകളാണ് ഇറാൻ മുന്നോട്ടുവെച്ചതെന്നും അദ്ദേഹം പറഞ്ഞു.
മൂന്ന് നിബന്ധനകൾ മുന്നോട്ട്
ഇറാന്റെ പരമാധികാരം പൂർണ്ണമായി അംഗീകരിക്കുക, യുദ്ധം മൂലമുണ്ടായ നാശനഷ്ടങ്ങൾക്ക് മതിയായ നഷ്ടപരിഹാരം നൽകുക, ഭാവിയിൽ സമാനമായ ആക്രമണങ്ങൾ ഉണ്ടാകില്ലെന്ന് അന്താരാഷ്ട്ര തലത്തിൽ ഉറപ്പ് നൽകുക—ഈ മൂന്ന് കാര്യങ്ങൾ അംഗീകരിച്ചാൽ യുദ്ധം അവസാനിപ്പിക്കാൻ തയ്യാറാണെന്ന് പ്രസിഡൻറ് വ്യക്തമാക്കി.
റഷ്യയിലെയും പാകിസ്താനിലെയും നേതാക്കളുമായി നടത്തിയ സംഭാഷണങ്ങളിലും ഈ നിലപാട് വ്യക്തമാക്കിയതായി അദ്ദേഹം കൂട്ടിച്ചേർത്തു. മേഖലയിലെ സമാധാനത്തിന് ഇറാൻ പ്രതിജ്ഞാബദ്ധമാണെന്നും, എന്നാൽ അമേരിക്കയും ഇസ്രയേലും ആരംഭിച്ച ഈ യുദ്ധം അവസാനിക്കണമെങ്കിൽ ഇറാന്റെ അവകാശങ്ങൾ അംഗീകരിക്കണമെന്നും അദ്ദേഹം പറഞ്ഞു.
യു.എൻ പ്രമേയം അംഗീകരിച്ചു
അതേസമയം, മേഖലയിലെ ആക്രമണങ്ങൾ ഉടൻ നിർത്തണമെന്ന് ആവശ്യപ്പെട്ടുള്ള പ്രമേയം യു.എൻ രക്ഷാസമിതി അംഗീകരിച്ചു. എന്നാൽ വോട്ടെടുപ്പിൽ റഷ്യയും ചൈനയും വിട്ടുനിന്നു.
പ്രമേയം പക്ഷപാതപരവും രാഷ്ട്രീയ പ്രേരിതവുമാണെന്നാണ് ഇറാന്റെ ഔദ്യോഗിക പ്രതികരണം.
ഹോർമുസ് കടലിടുക്ക് വിഷയത്തിൽ മുന്നറിയിപ്പ്
ഇതിനിടെ, ഡോണാൾഡ് ട്രംപ് മുന്നറിയിപ്പ് നൽകി. ഇറാൻ ഹുർമുസ് കടലിടുക്കിലൂടെയുള്ള എണ്ണക്കടത്ത് തടയാൻ ശ്രമിച്ചാൽ നിലവിലുള്ളതിനേക്കാൾ 20 മടങ്ങ് ശക്തിയോടെ അമേരിക്ക തിരിച്ചടിക്കുമെന്ന് അദ്ദേഹം പറഞ്ഞു.
എന്നാൽ ട്രംപിന്റെ ഭീഷണിയെ തള്ളി ഇറാൻ സുപ്രീം നാഷണൽ സെക്യൂരിറ്റി കൗൺസിൽ സെക്രട്ടറി അലി ലാരിജാനി രംഗത്തെത്തി. അമേരിക്കയുമായി, ഇസ്രയേലുമായി അല്ലെങ്കിൽ അവരുടെ സഖ്യകക്ഷികളുമായി ബന്ധമുള്ള കപ്പലുകളെയാണ് ലക്ഷ്യമിടുകയെന്ന് ഇറാന്റെ ഇസ്ലാമിക് റെവല്യൂഷണറി ഗാർഡ്സ് വ്യക്തമാക്കി.
മേഖലയിലെ സംഘർഷം കൂടുതൽ രൂക്ഷമാകാനുള്ള സാധ്യത ഉയർന്ന സാഹചര്യത്തിലാണ് പരസ്പര മുന്നറിയിപ്പുകൾ ശക്തമാകുന്നത്.
