ന്യൂഡൽഹി: വിദ്യാർത്ഥികളുടെ അക്കാദമിക് പ്രകടനത്തിനപ്പുറം അവരുടെ പെരുമാറ്റത്തിലും ദൈനംദിന ജീവിതത്തിലും അധ്യാപകർ ശ്രദ്ധ പുലർത്തണമെന്ന് പ്രധാനമന്ത്രി നരേന്ദ്ര മോദി.
ലോക് കല്യാൺ മാർഗിലെ വസതിയിൽ ദേശീയ അധ്യാപക പുരസ്കാര ജേതാക്കളായ 82 അധ്യാപകരുമായി പ്രധാനമന്ത്രി സംവദിച്ചു. വിദ്യാർത്ഥികളിലെ ലഹരി ഉപയോഗം, അമിതമായ സ്ക്രീൻ സമയം തുടങ്ങിയ വിഷയങ്ങളിൽ അധ്യാപകർ ജാഗ്രത പാലിക്കണമെന്ന് അദ്ദേഹം ആവശ്യപ്പെട്ടു.
കായിക വിനോദങ്ങൾ, സർഗാത്മക പ്രവർത്തനങ്ങൾ എന്നിവയിലൂടെ കുട്ടികളെ അമിതമായ മൊബൈൽ ഉപയോഗത്തിൽ നിന്ന് മാറ്റണമെന്നും മോദി പറഞ്ഞു. ദേശീയ വിദ്യാഭ്യാസ നയത്തിൻ്റെ ഭാഗമായി ക്ലാസ് മുറിക്ക് പുറത്തുള്ള പഠനത്തിനും യാഥാർത്ഥ്യജീവിത നൈപുണ്യങ്ങൾക്കും പ്രാധാന്യം നൽകേണ്ടത് അത്യാവശ്യമാണെന്നും അദ്ദേഹം വ്യക്തമാക്കി.
