തിരുവനന്തപുരം: തെക്കുപടിഞ്ഞാറൻ മൺസൂൺ ദുർബലമായി തുടരുകയും മഴ വിട്ടുനിൽക്കുകയും ചെയ്തതോടെ കേരളത്തിൻ്റെ വിവിധ ഭാഗങ്ങളിൽ താപനില സാധാരണയെക്കാൾ ഉയർന്നു. ഇതോടെ വൈദ്യുതി ഉപഭോഗം വർധിച്ചതിനാൽ വൈകുന്നേരങ്ങളിലെ പീക്ക് സമയത്ത് ഭാഗിക വൈദ്യുതി നിയന്ത്രണം ഏർപ്പെടുത്തേണ്ട സാഹചര്യമുണ്ടാകാമെന്ന് അധികൃതർ മുന്നറിയിപ്പ് നൽകി.
കേന്ദ്ര കാലാവസ്ഥാ വകുപ്പിൻ്റെ (IMD) ഏറ്റവും പുതിയ കണക്കുകൾ പ്രകാരം ഞായറാഴ്ച കോട്ടയത്ത് 35 ഡിഗ്രി സെൽഷ്യസ് താപനിലയാണ് രേഖപ്പെടുത്തിയത്. സാധാരണയെക്കാൾ 4.4 ഡിഗ്രി കൂടുതലാണിത്. സംസ്ഥാനത്തെ കാലാവസ്ഥാ നിരീക്ഷണ കേന്ദ്രങ്ങളിൽ രേഖപ്പെടുത്തിയ ഏറ്റവും ഉയർന്ന താപനിലയാണിത്.
കൊല്ലം ജില്ലയിലെ പുനലൂരിൽ 35.2 ഡിഗ്രി സെൽഷ്യസ് രേഖപ്പെടുത്തി. സാധാരണയേക്കാൾ 3.7 ഡിഗ്രി കൂടുതൽ താപനിലയാണ് ഇവിടെ രേഖപ്പെടുത്തിയത്. വെള്ളാനിക്കരയിലും പാലക്കാട്ടും 34.3 ഡിഗ്രി സെൽഷ്യസ് വീതമാണ് രേഖപ്പെടുത്തിയത്. ഇവിടങ്ങളിൽ സാധാരണ താപനിലയെക്കാൾ യഥാക്രമം 4.1, 3.9 ഡിഗ്രി സെൽഷ്യസ് കൂടുതലായിരുന്നു.
ചൂട് വർധിച്ചതോടെ ഫാനുകൾ, എയർ കണ്ടീഷണറുകൾ തുടങ്ങിയ വൈദ്യുതി ഉപകരണങ്ങളുടെ ഉപയോഗം കൂടിയതാണ് ഉപഭോഗം ഉയരാൻ പ്രധാന കാരണം. വൈകുന്നേരങ്ങളിലെ ഉയർന്ന വൈദ്യുതി ആവശ്യകത സംസ്ഥാനത്തെ വൈദ്യുതി സംവിധാനത്തിൽ അധിക സമ്മർദം സൃഷ്ടിക്കുന്നുണ്ട്.
