കൊൽക്കത്ത: കൊൽക്കത്തയിലെ ദുർഗാപൂജ പന്തലിലുണ്ടായ തിക്കിലും തിരക്കിലുംപെട്ട് മരിച്ച 19 പേരിൽ ഭൂരിഭാഗം പേരുടെയും മരണകാരണം നെഞ്ചിലേറ്റ കടുത്ത സമ്മർദത്തെത്തുടർന്നുണ്ടായ ശ്വാസംമുട്ടലാണെന്ന് പ്രാഥമിക പോസ്റ്റ്മോർട്ടം റിപ്പോർട്ട്. സംസ്ഥാന ആരോഗ്യവകുപ്പിലെ മുതിർന്ന ഉദ്യോഗസ്ഥനെ ഉദ്ധരിച്ചാണ് റിപ്പോർട്ട് പുറത്തുവന്നത്.
ചിലരുടെ ശരീരത്തിൽ ഗുരുതരമായ ആന്തരിക പരിക്കുകൾ കണ്ടെത്തിയിട്ടുണ്ട്. ശ്വാസകോശം, ആമാശയം, കരൾ, പാൻക്രിയാസ് തുടങ്ങിയ ആന്തരിക അവയവങ്ങൾക്ക് ക്ഷതമേറ്റതായും തലയ്ക്ക് പരിക്കുകളുണ്ടായതായും റിപ്പോർട്ടിൽ പറയുന്നു.
ചിലർക്ക് കൈകൾക്കും കാലുകൾക്കും ഒടിവുകളുണ്ടായിരുന്നു. തലയോട്ടിക്കുള്ളിൽ രക്തസ്രാവം (ഇൻട്രാക്രാനിയൽ ഹെമറേജ്) ഉണ്ടായതായും ഒന്നിലധികം പരിക്കുകൾ കണ്ടെത്തിയതായും ഉദ്യോഗസ്ഥർ വ്യക്തമാക്കി.
നെഞ്ചിലേറ്റ കടുത്ത സമ്മർദം മൂലം ശ്വസിക്കാൻ കഴിയാത്ത സാഹചര്യമുണ്ടായതാണ് ഭൂരിഭാഗം മരണങ്ങൾക്കും കാരണമായതെന്നാണ് പ്രാഥമിക നിഗമനം. പോസ്റ്റ്മോർട്ടം റിപ്പോർട്ടുകൾ പ്രാഥമിക ഘട്ടത്തിലാണെന്നും ഉദ്യോഗസ്ഥൻ അറിയിച്ചു.
