ന്യൂഡൽഹി: ഡൽഹിയിലെ രാംലീല മൈതാനിൽ നടന്ന വിജയദശമി ആഘോഷങ്ങളിൽ പ്രധാനമന്ത്രി നരേന്ദ്ര മോദി പങ്കെടുത്തു. രാജ്യത്തെ ജനങ്ങൾക്ക് വിജയദശമി ആശംസകൾ നേർന്ന അദ്ദേഹം, ശ്രീരാമന്റെ ആദർശങ്ങളുടെ പ്രസക്തി എടുത്തുപറഞ്ഞു.
വിജയദശമി ശുഭദിനത്തിൽ എല്ലാ രാജ്യവാസികൾക്കും ഹൃദയം നിറഞ്ഞ ആശംസകൾ നേരുന്നതായി പ്രസംഗത്തിന്റെ തുടക്കത്തിൽ പ്രധാനമന്ത്രി പറഞ്ഞു. തിന്മയ്ക്കുമേൽ നന്മയും അധർമ്മത്തിനുമേൽ ധർമ്മവും സത്യത്തിനുമേൽ അസത്യവും വിജയിക്കുന്നതിന്റെ പ്രതീകമാണ് വിജയദശമിയെന്നും അദ്ദേഹം ചൂണ്ടിക്കാട്ടി.
ഇന്ത്യയിലെ ഗ്രാമങ്ങളിലും നഗരങ്ങളിലും രാംലീല അവതരണങ്ങൾ നടക്കുന്നത് ശ്രീരാമന്റെ ആദർശങ്ങളും മൂല്യങ്ങളും തലമുറകളിലേക്ക് പകർന്നുനൽകുന്നതിന്റെ ഭാഗമാണെന്ന് മോദി പറഞ്ഞു. സ്വേച്ഛാധിപത്യത്തിന്റെയും ഭീതിയുടെയും അന്ത്യവും ശാശ്വത സത്യത്തിന്റെ വിജയവുമാണ് ഈ ആഘോഷങ്ങൾ ഓർമിപ്പിക്കുന്നതെന്നും അദ്ദേഹം വ്യക്തമാക്കി.
രാജ്യത്തുടനീളം ധർമ്മത്തിന്റെ വിജയമാഘോഷിക്കുന്ന വേളയിൽ ദേവനാമങ്ങൾ ഒരുമിച്ച് ഉച്ചരിക്കാൻ പ്രധാനമന്ത്രി സദസ്സിനോട് ആഹ്വാനം ചെയ്തു.
വിജയദശമി വെറുമൊരു ഉത്സവമല്ലെന്നും അത് ഇന്ത്യയുടെ ജീവചൈതന്യമാണെന്നും മോദി പറഞ്ഞു. രാജ്യത്തിന്റെ സാംസ്കാരിക പാരമ്പര്യത്തിലും ജനജീവിതത്തിലും ഈ ആഘോഷത്തിനുള്ള ആഴത്തിലുള്ള പ്രാധാന്യവും അദ്ദേഹം ചൂണ്ടിക്കാട്ടി.
