തിരുവനന്തപുരം: കടുത്ത വേനൽക്കാലത്തോടെ സംസ്ഥാനത്ത് പലയിടങ്ങളിലും സൂര്യരശ്മിയിൽ നിന്നുള്ള അൾട്രാവയലറ്റ് വികിരണത്തിന്റെ തോത് വർധിച്ചതായി ദുരന്തനിവാരണ അതോറിറ്റി. 14 ജില്ലകളിലും സ്ഥാപിച്ച അൾട്രാവയലറ്റ് മീറ്ററുകളുടെ അടിസ്ഥാനത്തിൽ ദിവസേന സൂചിക പ്രസിദ്ധീകരിക്കുന്നു.
ഇന്നലെ പ്രസിദ്ധീകരിച്ച സൂചിക അനുസരിച്ച് ഇടുക്കിയിലെ മൂന്നാറും കൊല്ലത്തിന്റെ കൊട്ടാരക്കരയും ഏറ്റവും അപകടകരമായ തോതിൽ (8) എത്തി. കോന്നി, ചങ്ങനാശ്ശേരി, ചെങ്ങന്നൂർ, പൊന്നാനി എന്നിവിടങ്ങളിൽ സൂചിക 7 ആയി രേഖപ്പെടുത്തി. തൃത്താലയിൽ 6 ആയിരുന്നു.
മുന്നറിയിപ്പുകൾ:
- സൂചിക 8-10 ആയാൽ ഓറഞ്ച് മുന്നറിയിപ്പ്, 11-ന് മുകളിൽ ആയാൽ ചുവപ്പ് മുന്നറിയിപ്പ് നൽകും.
- അൾട്രാവയലറ്റ് വികിരണം കാൻസർ, നേത്രരോഗങ്ങൾ, ചർമരോഗങ്ങൾ എന്നിവയ്ക്കു കാരണമാകാൻ സാധ്യതയുണ്ട്.
- തൊപ്പി, കുട, സൺഗ്ലാസ് എന്നിവ ഉപയോഗിക്കണം.
- ശരീരം മുഴുവൻ മറയ്ക്കുന്ന പരുത്തി വസ്ത്രങ്ങൾ ധരിക്കുക.
- വെയിലത്ത് കൂടുതൽ നേരം തങ്ങുന്നത് ഒഴിവാക്കണം.
