ഗുരുവായൂർ: ഗുരുവായൂർ ദേവസ്വം മേൽപുത്തൂർ സ്മാരക ആയുർവ്വേദ ആശുപത്രിയുടെ സിൽവർ ജൂബിലി ആഘോഷങ്ങളുടെ ഭാഗമായി നാളെ (ഫെബ്രുവരി 13, വെള്ളിയാഴ്ച) നാരായണീയം ഹാളിൽ ആയൂർവ്വേദ സെമിനാർ സംഘടിപ്പിക്കുന്നു. ദേവസ്വം ചെയർമാൻ ഡോ. വി.കെ. വിജയൻ ഉദ്ഘാടനം നിർവ്വഹിക്കുന്ന ചടങ്ങിൽ ആയൂർവ്വേദ ചികിത്സാ വിദഗ്ധരും അക്കാദമിക് പണ്ഡിതരും പങ്കെടുക്കും. ദേവസ്വം ഭരണസമിതി അംഗം ബ്രഹ്മശ്രീ മല്ലിശ്ശേരി പരമേശ്വരൻ നമ്പൂതിരിപ്പാട് സ്വാഗതം ആശംസിക്കും.
സെമിനാറിൽ ഡോ. സുബിൻ വൈദ്യ മഠം (പ്രൊഫസർ, കോട്ടക്കൽ ആയൂർവ്വേദ കോളേജ്), ഡോ. മുത്തുലക്ഷ്മി (മുൻ പ്രോ വൈസ് ചാൻസലർ, ശ്രീശങ്കരാചാര്യ സംസ്കൃത സർവ്വകലാശാല) എന്നിവർ പ്രബന്ധങ്ങൾ അവതരിപ്പിക്കും. അഷ്ടാംഗം ആയൂർവ്വേദ കോളേജ് പ്രിൻസിപ്പാൾ ഡോ. ആലത്തിയൂർ നാരായണൻ നമ്പി മോഡറേറ്ററായിരിക്കും. ആയൂർവ്വേദത്തിന്റെ സമകാലിക പ്രസക്തിയും ചികിത്സാരംഗത്തെ പുതുവഴികളും ചർച്ചയാകുന്ന സെമിനാർ വൈദ്യശാസ്ത്ര മേഖലയിൽ ശ്രദ്ധേയമാകുമെന്ന് സംഘാടകർ അറിയിച്ചു.
