ഇറാഖിൻ്റെ പുതിയ പ്രധാനമന്ത്രിയായി ചുമതലയേറ്റ അലി ഫലിഹ് ഖാദിം അൽ സെയ്ദിക്ക് അഭിനന്ദനങ്ങൾ നേർന്ന് പ്രധാനമന്ത്രി നരേന്ദ്രമോദി. ഇരു രാജ്യങ്ങളും തമ്മിലുള്ള ദീർഘകാല സൗഹൃദബന്ധം കൂടുതൽ ശക്തിപ്പെടുത്താൻ ഇന്ത്യ പ്രതിബദ്ധമാണെന്നും പ്രധാനമന്ത്രി വ്യക്തമാക്കി.
സമൂഹമാധ്യമമായ എക്സിൽ പങ്കുവെച്ച കുറിപ്പിലാണ് പുതിയ ഇറാഖ് പ്രധാനമന്ത്രിക്ക് നരേന്ദ്രമോദി ആശംസകൾ അറിയിച്ചത്. ഇന്ത്യ ഇറാഖുമായുള്ള ദീർഘകാല സൗഹൃദബന്ധത്തെ ഏറെ വില കൽപിക്കുന്നുണ്ടെന്നും എല്ലാ മേഖലകളിലും സഹകരണം കൂടുതൽ വിപുലീകരിക്കാൻ ഇന്ത്യ തയ്യാറാണെന്നും അദ്ദേഹം കുറിച്ചു.
ഇരു രാജ്യങ്ങളുടെയും പുരോഗതിക്കും സമൃദ്ധിക്കുമായി ഒരുമിച്ച് പ്രവർത്തിക്കാൻ ആഗ്രഹിക്കുന്നതായും പുതിയ പ്രധാനമന്ത്രിക്ക് എല്ലാ ആശംസകളും നേരുന്നതായും മോദി പറഞ്ഞു.
ഊർജ മേഖല ഉൾപ്പെടെ വിവിധ മേഖലകളിൽ ഇന്ത്യയും ഇറാഖും തമ്മിൽ ദീർഘകാല നയതന്ത്ര-സാമ്പത്തിക ബന്ധങ്ങളാണുള്ളത്.
