വിശാഖപട്ടണം: തദ്ദേശീയമായി നിർമ്മിച്ച അത്യാധുനിക സ്റ്റെൽത്ത് ഫ്രിഗേറ്റായ ഐഎൻഎസ് മഹേന്ദ്രഗിരി ഇന്ത്യൻ നാവികസേനയുടെ കിഴക്കൻ നാവികസേനാ വിഭാഗത്തിൽ (Eastern Fleet) ഉൾപ്പെടുത്തി. ആന്ധ്രാപ്രദേശിലെ വിശാഖപട്ടണത്ത് നടന്ന ചടങ്ങിൽ പ്രതിരോധമന്ത്രി രാജ്നാഥ് സിംഗ് യുദ്ധക്കപ്പൽ നാവികസേനയ്ക്ക് സമർപ്പിച്ചു.
രാജ്യത്തിൻ്റെ കപ്പൽനിർമാണ രംഗത്തെ സ്വയംപര്യാപ്തതയുടെയും പ്രതിരോധ ഉൽപ്പാദന ശേഷിയുടെയും പ്രതീകമാണ് ഐഎൻഎസ് മഹേന്ദ്രഗിരിയെന്ന് രാജ്നാഥ് സിംഗ് പറഞ്ഞു.
പ്രോജക്ട് 17എ പദ്ധതിയുടെ ഭാഗമായി വികസിപ്പിച്ച ആറാമത്തെ തദ്ദേശീയ സ്റ്റെൽത്ത് ഫ്രിഗേറ്റാണ് ഐഎൻഎസ് മഹേന്ദ്രഗിരി. ഇന്ത്യൻ നാവികസേനയുടെ വാർഷിപ്പ് ഡിസൈൻ ബ്യൂറോ രൂപകൽപ്പന ചെയ്ത കപ്പൽ മുംബൈയിലെ മസഗോൺ ഡോക്ക് ഷിപ്പ്ബിൽഡേഴ്സ് ലിമിറ്റഡാണ് (MDL) നിർമ്മിച്ചത്.
വ്യോമപ്രതിരോധം, ശത്രുകപ്പലുകൾക്കും അന്തർവാഹിനികൾക്കുമെതിരായ പോരാട്ടം, സമുദ്രനിരീക്ഷണം, സമുദ്രസുരക്ഷാ ദൗത്യങ്ങൾ, മാനുഷിക സഹായവും ദുരന്തനിവാരണ പ്രവർത്തനങ്ങളും ഉൾപ്പെടെ വിവിധ ദൗത്യങ്ങൾ നിർവഹിക്കാൻ ശേഷിയുള്ളതാണ് ഐഎൻഎസ് മഹേന്ദ്രഗിരി.
ശത്രുവിൻ്റെ നിരീക്ഷണ സംവിധാനങ്ങൾക്ക് എളുപ്പത്തിൽ കണ്ടെത്താനാകാത്ത വിധത്തിൽ പ്രത്യേക രൂപകൽപ്പനയിൽ നിർമ്മിച്ച കപ്പലുകളെയാണ് സ്റ്റെൽത്ത് യുദ്ധക്കപ്പലുകൾ എന്നതുകൊണ്ട് ഉദ്ദേശിക്കുന്നത്. സാങ്കേതികവിദ്യ കൊണ്ടും ഈ കപ്പലുകൾക്ക് പ്രത്യേകതകളുണ്ട്.
റഡാർ, ഇൻഫ്രാറെഡ്, ദൃശ്യപരമായ തിരിച്ചറിയൽ, ശബ്ദം (അക്കൗസ്റ്റിക് സിഗ്നേച്ചർ) എന്നിവ പരമാവധി കുറച്ചാണ് ഈ കപ്പലുകളുടെ രൂപകൽപ്പന ചെയ്തിരിക്കുന്നത്. അതുകൊണ്ട് തന്നെ ശത്രുക്കൾക്ക് ഈ കപ്പൽ കണ്ടെത്താനും നിരീക്ഷിക്കാനും ലക്ഷ്യമിടാനും ആക്രമിക്കാനും വളരെ ബുദ്ധിമുട്ടാകും എന്നതാണ് ഇതിൻ്റെ പ്രധാന സവിശേഷത. ആധുനിക നാവിക യുദ്ധങ്ങളിൽ നിർണായകമായ മുൻതൂക്കം നൽകുന്ന സാങ്കേതികവിദ്യയാണ് സ്റ്റെൽത്ത് സംവിധാനം.
