തിരഞ്ഞെടുപ്പ് നടപടികളിലെ സുതാര്യത ശക്തിപ്പെടുത്താൻ ആദ്യ അഖിലേന്ത്യാ മാധ്യമ സമ്മേളനം സംഘടിപ്പിച്ച് തിരഞ്ഞെടുപ്പ് കമ്മീഷൻ

ന്യൂഡൽഹി: തിരഞ്ഞെടുപ്പ് നടപടികളിലെ സുതാര്യതയും മാധ്യമങ്ങളുടെ പങ്കും ശക്തിപ്പെടുത്തുന്നതിനായി “പങ്കാളികളെ ബന്ധിപ്പിച്ച് ജനാധിപത്യം ശക്തിപ്പെടുത്തുക: തിരഞ്ഞെടുപ്പിലെ മാധ്യമങ്ങളുടെ പങ്ക്” എന്ന വിഷയത്തിൽ തിരഞ്ഞെടുപ്പ് കമ്മീഷൻ ഓഫ് ഇന്ത്യ (ECI) ആദ്യ അഖിലേന്ത്യാ മാധ്യമ സമ്മേളനം 2026 സംഘടിപ്പിച്ചു. രാജ്യത്തെ വിവിധ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും 380-ലധികം മാധ്യമപ്രവർത്തകർ സമ്മേളനത്തിൽ പങ്കെടുത്തു.

ഇന്ത്യയിലെ തിരഞ്ഞെടുപ്പുകൾ ഭരണഘടനയും തിരഞ്ഞെടുപ്പ് നിയമങ്ങളും തിരഞ്ഞെടുപ്പ് കമ്മീഷൻ കാലാകാലങ്ങളിൽ പുറപ്പെടുവിക്കുന്ന മാർഗനിർദേശങ്ങളും അനുസരിച്ചാണ് നടത്തുന്നതെന്ന് സമ്മേളനം ഉദ്ഘാടനം ചെയ്ത് സംസാരിച്ച മുഖ്യ തിരഞ്ഞെടുപ്പ് കമ്മീഷണർ ജ്ഞാനേഷ് കുമാർ വ്യക്തമാക്കി. തിരഞ്ഞെടുപ്പ് പ്രക്രിയയുടെ ഓരോ ഘട്ടവും വിവിധ പങ്കാളികളുടെ സമാന്തര പരിശോധനയ്ക്ക് (Concurrent Audit) വിധേയമാകുന്നതിനാൽ സംവിധാനത്തിൻ്റെ വിശ്വാസ്യതയും സുതാര്യതയും ഉറപ്പാക്കപ്പെടുന്നുണ്ടെന്നും അദ്ദേഹം പറഞ്ഞു.

രാജ്യത്തെ ഏകദേശം 95 കോടി വോട്ടർമാർ ഉൾപ്പെടുന്ന വോട്ടർപട്ടിക കാലാനുസൃതമായി പുതുക്കിക്കൊണ്ടിരിക്കുന്ന ഒരു ‘സജീവ രേഖ’ (Living Document) ആണെന്ന് അദ്ദേഹം വിശേഷിപ്പിച്ചു. വോട്ടർപട്ടിക തയ്യാറാക്കുന്നതിലും പുതുക്കുന്നതിലും 12 ലക്ഷത്തിലധികം ബൂത്ത് ലെവൽ ഓഫീസർമാരും (BLO) 15 ലക്ഷത്തിലധികം ബൂത്ത് ലെവൽ ഏജൻ്റുമാരും (BLA) സജീവമായി പ്രവർത്തിക്കുന്നുണ്ടെന്നും, ഇവർ തിരഞ്ഞെടുപ്പ് പ്രക്രിയയിലെ സമാന്തര ഓഡിറ്റർമാരായി പ്രവർത്തിക്കുന്നുവെന്നും അദ്ദേഹം വ്യക്തമാക്കി.

സമീപകാല നിയമസഭാ തിരഞ്ഞെടുപ്പുകളിലെ റെക്കോർഡ് പോളിംഗ് ശതമാനം രാജ്യത്തെ ജനങ്ങൾക്ക് തിരഞ്ഞെടുപ്പ് സംവിധാനത്തിലും ഇന്ത്യൻ ജനാധിപത്യത്തിലും ഉള്ള വിശ്വാസത്തിൻ്റെ തെളിവാണെന്ന് ജ്ഞാനേഷ് കുമാർ പറഞ്ഞു. സ്‌പെഷ്യൽ ഇൻ്റൻസീവ് റിവിഷൻ (SIR) നടപടികളിൽ പങ്കെടുത്ത രാജ്യത്തെ എല്ലാ വോട്ടർമാർക്കും അദ്ദേഹം നന്ദിയും രേഖപ്പെടുത്തി.

ഇന്ത്യയിലെ തിരഞ്ഞെടുപ്പ് നടപടിക്രമങ്ങൾ, അതിലെ സുതാര്യത ഉറപ്പാക്കുന്ന നിയമപരമായ സംവിധാനങ്ങൾ, രാഷ്ട്രീയ പാർട്ടികളുടെയും സ്ഥാനാർത്ഥികളുടെയും പങ്ക് എന്നിവയെക്കുറിച്ച് മാധ്യമപ്രവർത്തകർക്ക് വ്യക്തമായ ധാരണ നൽകുകയെന്ന ലക്ഷ്യത്തോടെയാണ് സമ്മേളനം സംഘടിപ്പിച്ചത്.

സമ്മേളനത്തിൽ ഭരണഘടനാ വ്യവസ്ഥകൾ, 1950-ലെയും 1951-ലെയും ജനപ്രാതിനിധ്യ നിയമങ്ങൾ, തിരഞ്ഞെടുപ്പ് കമ്മീഷൻ്റെ മാർഗനിർദേശങ്ങൾ, ECINET ഡിജിറ്റൽ പ്ലാറ്റ് ഫോം, തിരഞ്ഞെടുപ്പിലെ സാങ്കേതികവിദ്യയുടെ ഉപയോഗം, തിരഞ്ഞെടുപ്പ് കാലത്തെ മാധ്യമങ്ങളുമായി ബന്ധപ്പെട്ട നിയമങ്ങൾ എന്നിവയെക്കുറിച്ച് വിശദമായ ക്ലാസുകൾ നടന്നു.

കൂടാതെ ബൂത്ത് ലെവൽ ഏജൻ്റുമാർ (BLA), പോളിംഗ് ഏജൻ്റുമാർ, കൗണ്ടിംഗ് ഏജൻ്റുമാർ എന്നിവരുടെ ചുമതലകളും തിരഞ്ഞെടുപ്പ് സുതാര്യത ഉറപ്പാക്കുന്നതിലുള്ള അവരുടെ നിർണായക പങ്കും വിശദീകരിച്ചു.

പരിപാടിയുടെ ഭാഗമായി വോട്ടർപട്ടിക തയ്യാറാക്കൽ, വോട്ടെടുപ്പ് നടപടിക്രമം, വോട്ടെണ്ണൽ എന്നിവയുടെ തത്സമയ മാതൃകാപ്രദർശനവും സംഘടിപ്പിച്ചു. വിവിധ നിയമപരമായ ഫോമുകളും തിരഞ്ഞെടുപ്പ് നടപടിക്രമങ്ങളും മാധ്യമപ്രവർത്തകർക്ക് നേരിട്ട് പരിചയപ്പെടാനുള്ള അവസരവും ഒരുക്കി.

അവസാനമായി, മാധ്യമപ്രവർത്തകരുടെ ചോദ്യങ്ങൾക്ക് മുഖ്യ തിരഞ്ഞെടുപ്പ് കമ്മീഷണർ ജ്ഞാനേഷ് കുമാർ മറുപടി നൽകിയ സംവാദപരിപാടിയോടെയാണ് സമ്മേളനം സമാപിച്ചത്.