തിരുവനന്തപുരം: സംസ്ഥാനത്ത് ഇനി മുതൽ എല്ലാ ബസുകളിലും കാമറ നിർബന്ധമെന്ന് സ്റ്റേറ്റ് ട്രാൻസ്പോർട്ട് അതോറിറ്റി (STA) ഉത്തരവ് പുറപ്പെടുവിച്ചു. കെഎസ്ആർടിസി, സ്വകാര്യ ബസുകൾ, സ്കൂൾ ബസുകൾ എന്നിവയ്ക്കാണ് ഈ നിർദേശം ബാധകമാകുന്നത്.
ബസിന്റെ മുൻവശം, പിൻവശം, അകത്തളങ്ങൾ എന്നിവ കാണുന്ന രീതിയിൽ മൂന്നു കാമറകളാണ് നിർബന്ധമായും സ്ഥാപിക്കേണ്ടത്. മാർച്ച് 31നകം കാമറകൾ സ്ഥാപിക്കണമെന്നാണ് നിർദ്ദേശം. കൂടാതെ, ഡ്രൈവർ ഉറങ്ങിപ്പോകുന്നത് നിരീക്ഷിക്കാനായി അലാറം സംവിധാനമുള്ള കാമറയും ബസുകളിൽ ഘടിപ്പിക്കണമെന്ന് ഉത്തരവിൽ പറയുന്നു.
അതോടൊപ്പം, ഓട്ടോറിക്ഷകളിൽ മീറ്റർ ഉപയോഗിക്കാതെ യാത്ര നടത്തിയാൽ യാത്രക്കാർ പണം നൽകേണ്ടതില്ലെന്ന സ്റ്റിക്കറും പതിപ്പിക്കാനും നിർദേശം നൽകിയിട്ടുണ്ട്.
