ന്യൂഡൽഹി: മൂന്ന് ദിവസത്തെ ഔദ്യോഗിക സന്ദർശനത്തിനായി പ്രധാനമന്ത്രി നരേന്ദ്ര മോദി തിങ്കളാഴ്ച ഫിലിപ്പീൻസ് തലസ്ഥാനമായ മനിലയിലെത്തും. വാർഷിക ഇന്ത്യ-ആസിയാൻ ഉച്ചകോടിയിൽ പങ്കെടുക്കുന്നതിനായാണ് സന്ദർശനം. സമുദ്രസുരക്ഷാ സഹകരണം ശക്തിപ്പെടുത്തുന്നതിനും വ്യാപാര-നിക്ഷേപ ബന്ധങ്ങൾ മെച്ചപ്പെടുത്തുന്നതിനുമാകും ഉച്ചകോടിയിൽ പ്രധാന പരിഗണന.
വാർഷിക കിഴക്കൻ ഏഷ്യൻ ഉച്ചകോടിയിലും മോദി പങ്കെടുക്കും. 11 അംഗ ആസിയാൻ കൂട്ടായ്മയുടെ നിലവിലെ അധ്യക്ഷരാജ്യമെന്ന നിലയിൽ ഫിലിപ്പീൻസാണ് ഉച്ചകോടികൾക്ക് ആതിഥേയത്വം വഹിക്കുന്നത്.
അമേരിക്കൻ പ്രസിഡൻ്റ് ഡൊണാൾഡ് ട്രംപ്, ഓസ്‌ട്രേലിയൻ പ്രധാനമന്ത്രി ആന്തണി അൽബനീസ്, ജപ്പാൻ പ്രധാനമന്ത്രി സനേ തകായിച്ചി എന്നിവർക്കൊപ്പം മോദി ക്വാഡ് ഉച്ചകോടിയിലും പങ്കെടുക്കുമെന്നാണ് സൂചന. എന്നാൽ ക്വാഡ് ഉച്ചകോടി സംബന്ധിച്ച് ഔദ്യോഗിക സ്ഥിരീകരണം പുറത്തുവന്നിട്ടില്ല.
