ന്യൂഡൽഹി: രാജ്യത്ത് സുസ്ഥിര വ്യോമയാന ഇന്ധനം (Sustainable Aviation Fuel – SAF) വ്യാപകമായി നടപ്പാക്കുന്നതിനുള്ള ഒരുക്കങ്ങൾ കേന്ദ്ര സർക്കാർ വിലയിരുത്തി. കേന്ദ്ര വ്യോമയാന മന്ത്രി കെ. രാം മോഹൻ നായിഡു വിവിധ മന്ത്രാലയങ്ങളിലെയും വ്യോമയാന മേഖലയിലെയും പ്രതിനിധികളുമായി ബുധനാഴ്ച നടത്തിയ യോഗത്തിലാണ് പുരോഗതി അവലോകനം ചെയ്തത്.
യോഗത്തിൽ, അന്താരാഷ്ട്ര സിവിൽ ഏവിയേഷൻ ഓർഗനൈസേഷൻ്റെ (ICAO) ആഗോള കാർബൺ പുറന്തള്ളൽ കുറയ്ക്കുന്നതിനുള്ള ചട്ടക്കൂടായ കാർബൺ ഓഫ്സെറ്റിംഗ് ആൻഡ് റിഡക്ഷൻ സ്കീം ഫോർ ഇൻ്റർനാഷണൽ ഏവിയേഷൻ (CORSIA) പാലിക്കുന്നതിനുള്ള ഇന്ത്യയുടെ തയ്യാറെടുപ്പുകളും വിലയിരുത്തി.
സുസ്ഥിര വ്യോമയാന ഇന്ധന (SAF) നയം അന്തിമഘട്ടത്തിലാണെന്ന് മന്ത്രി അറിയിച്ചു. വിവിധ കേന്ദ്ര മന്ത്രാലയങ്ങളുമായുള്ള കൂടിയാലോചനകളും വ്യോമയാന മേഖലയിലെ വിവിധ പങ്കാളികളുമായുള്ള ചർച്ചകളും പുരോഗമിക്കുകയാണെന്നും അദ്ദേഹം വ്യക്തമാക്കി.
വ്യോമയാന മേഖലയിലെ കാർബൺ പുറന്തള്ളൽ കുറയ്ക്കുകയും അന്താരാഷ്ട്ര കാലാവസ്ഥാ പ്രതിബദ്ധതകൾ പാലിക്കുകയും ചെയ്യുന്നതിനുള്ള കേന്ദ്ര സർക്കാരിൻ്റെ ശ്രമങ്ങളുടെ ഭാഗമായാണ് സുസ്ഥിര വ്യോമയാന ഇന്ധനത്തിൻ്റെ ഉപയോഗം പ്രോത്സാഹിപ്പിക്കുന്നത്.
