ന്യൂഡൽഹി: ജന്മാഷ്ടമി ദിനത്തിൽ രാജ്യത്തെ ജനങ്ങൾക്ക് രാഷ്ട്രപതി ദ്രൗപദി മുർമു ആശംസകൾ നേർന്നു. ഇന്ത്യയിലും വിദേശത്തുമുള്ള എല്ലാ ഇന്ത്യക്കാർക്കും ഹൃദയം നിറഞ്ഞ ആശംസകൾ നേരുന്നതായി രാഷ്ട്രപതി സന്ദേശത്തിൽ അറിയിച്ചു.
ഭഗവാൻ ശ്രീകൃഷ്ണൻ്റെ ജീവിതവും ഉപദേശങ്ങളും ഇന്ത്യൻ സാംസ്കാരിക, ദാർശനിക പൈതൃകത്തിന് പുതിയ ഊർജം പകരുന്നതാണെന്ന് രാഷ്ട്രപതി പറഞ്ഞു. സത്യം, ധർമ്മം, നീതി, കരുണ, നിസ്വാർത്ഥ സേവനം എന്നിവയുടെ പാതയാണ് ശ്രീകൃഷ്ണൻ മനുഷ്യരാശിക്ക് കാട്ടിക്കൊടുത്തതെന്നും അവർ വ്യക്തമാക്കി.
ശ്രീമദ് ഭഗവദ്ഗീതയിൽ ഉൾക്കൊള്ളുന്ന ശ്രീകൃഷ്ണൻ്റെ ഉപദേശങ്ങൾ പ്രയാസകരമായ സാഹചര്യങ്ങളിൽ വിവേകപൂർവമായ തീരുമാനങ്ങൾ എടുക്കാനും ധാർമിക മൂല്യങ്ങളിൽ ഉറച്ചുനിൽക്കാനും മനുഷ്യരാശിക്ക് എന്നും പ്രചോദനമേകുന്നതാണെന്ന് രാഷ്ട്രപതി ചൂണ്ടിക്കാട്ടി.
ഐക്യത്തിൻ്റെയും കർത്തവ്യബോധത്തിൻ്റെയും സേവന മനോഭാവത്തിൻ്റെയും പ്രാധാന്യം ഓർമിപ്പിക്കുന്നതാണ് ജന്മാഷ്ടമി ആഘോഷമെന്നും രാഷ്ട്രപതി പറഞ്ഞു.
ശ്രീകൃഷ്ണൻ്റെ ആദർശങ്ങൾ ജീവിതത്തിൽ പിന്തുടരാനും സമഗ്രവും വികസിതവുമായ ഇന്ത്യ കെട്ടിപ്പടുക്കുന്നതിനായി ആത്മാർഥമായി പ്രവർത്തിക്കാനും ജന്മാഷ്ടമി ദിനത്തിൽ എല്ലാവരും പ്രതിജ്ഞയെടുക്കണമെന്നും രാഷ്ട്രപതി ആഹ്വാനം ചെയ്തു.
