ജാതിവിവേചനങ്ങളും അനാചാരങ്ങളും ഉച്ചനീചത്വങ്ങളും ഇല്ലാതാക്കാൻ പൊതുസമൂഹം ഒറ്റക്കെട്ടായി പ്രവർത്തിക്കണമെന്ന് പട്ടികജാതി, പട്ടികവർഗ, പിന്നാക്ക ക്ഷേമ വകുപ്പ് മന്ത്രി കെ എ തുളസി പറഞ്ഞു. സമൂഹത്തിൽ നിലനിൽക്കുന്ന വിവേചനങ്ങൾ പൂർണമായി ഇല്ലാതാക്കാൻ നിയമനടപടികൾക്കൊപ്പം ജനങ്ങളിൽ യഥാർത്ഥ അവബോധം വളർത്തണം. പട്ടികജാതി പട്ടികവർഗ പിന്നാക്ക ക്ഷേമ വകുപ്പിന്റെ ആഭിമുഖ്യത്തിൽ ഒക്ടോബർ രണ്ട് മുതൽ 15 വരെ നടന്ന സാമൂഹ്യ ഐക്യദാർഢ്യ പക്ഷാചരണത്തിന്റെ സംസ്ഥാനതല സമാപന സമ്മേളനം തിരുവനന്തപുരം മഹാത്മാ അയ്യങ്കാളി ഹാളിൽ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
സർക്കാരിൻ്റെ നൂറ് ദിന കർമപരിപാടിയുടെ ഭാഗമായി വകുപ്പ് പ്രഖ്യാപിച്ച 32 പദ്ധതികളും സമയബന്ധിതമായി പൂർത്തിയാക്കാൻ കഴിഞ്ഞത് അഭിമാനകരമാണ്. അടിസ്ഥാന ജനവിഭാഗങ്ങളുടെ വികസനത്തിനും ക്ഷേമത്തിനുമായി അനുവദിക്കുന്ന സർക്കാർ ഫണ്ടുകൾ പാഴാകാതെ കൃത്യമായി വിനിയോഗിക്കും. ഇതിന്റെ ഭാഗമായി കെട്ടിക്കിടക്കുന്ന അപേക്ഷകൾ ഡിസംബർ 31നകം അടിയന്തരമായി തീർപ്പാക്കുമെന്നും മന്ത്രി പറഞ്ഞു.
കാലത്തിന്റെ മാറ്റങ്ങളും വെല്ലുവിളികളും നേരിടാൻ, സ്വാശ്രയത്വമുള്ള ഒരു നവജനസമൂഹത്തെ വാർത്തെടുക്കാൻ ലക്ഷ്യമിട്ടാണ് സാമൂഹ്യ ഐക്യദാർഢ്യ പക്ഷാചരണം ആചരിച്ചത്. ആദിവാസി മേഖലകളിലെ യാത്ര, ആരോഗ്യ പ്രശ്‌നങ്ങൾ ഘട്ടംഘട്ടമായി പരിഹരിക്കാൻ സർക്കാർ പ്രതിജ്ഞാബദ്ധമാണ്. ഇടമലക്കുടിയിലെ റോഡ് സൗകര്യങ്ങളുടെ അഭാവം, നിലമ്പൂരിലെ ചോലനായ്ക്കർ വിഭാഗത്തിന്റെ സവിശേഷമായ ജീവിതസാഹചര്യങ്ങൾ, അട്ടപ്പാടിയിലെ യാത്ര, ആരോഗ്യ പ്രശ്‌നങ്ങൾ എന്നിവയ്ക്ക് പ്രത്യേക പരിഗണന നൽകും. ഇത്തരം പ്രശ്‌നങ്ങൾ ഒറ്റയടിക്ക് പരിഹരിക്കാനാകില്ലെങ്കിലും നിശ്ചയദാർഢ്യത്തോടെ ഇടപെടലുകൾ തുടരുമെന്നും മന്ത്രി വ്യക്തമാക്കി.
