വേറിട്ട മേഖലകളിലെ മികവാർന്ന പ്രവർത്തനങ്ങളെ മാനിച്ച് അഡ്വ.ഏ.ഡി. ബെന്നിക്ക് സർഗ്ഗ ശേഷ്ഠ പുരസ്കാരം സമർപ്പിച്ചു. കോൺഫെഡറേഷൻ ഓഫ് കൺസ്യൂമർ പ്രൊട്ടക്ഷൻ വെൽഫെയർ അസോസിയേഷൻ, മഞ്ചേരി അർബൻ ബാങ്ക് ഓഡിറ്റോറിയത്തിൽ സംഘടിപ്പിച്ച ഉപഭോക്തൃ സംഗമത്തിൽ വെച്ചാണ് മഞ്ചേരി എം എൽ.എ ,യു.എ.ലത്തീഫ് അഡ്വ.ഏ.ഡി. ബെന്നിക്ക് പുരസ്ക്കാരം നൽകി ആദരിച്ചു. ഉപഭോക്തൃ കേസുകൾ നടത്തി റെക്കോഡിട്ടിട്ടുള്ള ബെന്നി വക്കീൽ ഉപഭോക്തൃ വിദ്യാഭ്യാസ രംഗത്തു് സജീവമായി ഇടപെട്ടു വരുന്നു.സാംസ്കാരിക രംഗത്തും ജീവകാരുണ്യരംഗത്തും ബെന്നി വക്കീൽ സജീവമാണ്. കിഡ്ണി ഫെഡറേഷൻ ഓഫ് ഇന്ത്യയുടെ സ്ഥാപക സെക്രട്ടറിയും ഇപ്പോഴത്തെ ഡയറക്ടറുമാണ്. ആയിരത്തിലധികം ലേഖനങ്ങളും വ്യത്യസ്ത വിഷയങ്ങളെ ആസ്പദമാക്കി ആയിരത്തിലധികം വീഡിയോകളും ബെന്നി വക്കീലിൻ്റേതായി പ്രസിദ്ധീകൃതമായിട്ടുണ്ട്. വൃക്കരോഗികൾക്ക് വേണ്ടി പ്രവർത്തിച്ചു വരവെ വൃക്കരോഗം ബാധിച്ച് വൃക്ക മാറ്റിവെക്കൽ ശസ്ത്രക്രിയ നടത്തി ജീവിതത്തിലേക്ക് തിരിച്ചു വന്ന ബെന്നി വക്കീലിൻ്റെ ജീവചരിത്ര ഗ്രന്ഥം പത്മവ്യൂഹം ഭേദിച്ച് പ്രചോദനാത്മകമാണ്. യോഗത്തിൽ മഞ്ചേരി എം.എൽ.എ.യു. എ.ലത്തീഫ് ഉദ്ഘാടനം നിർവ്വഹിച്ചു. കോൺഫെഡറേഷൻ ഓഫ് കൺസ്യൂമർ പ്രൊട്ടക്ഷൻ വെൽഫെയർ അസോസിയേഷൻ പ്രസിഡണ്ട് അനു സുനിൽകുമാർ അദ്ധ്യക്ഷത വഹിച്ചു. മലപ്പുറം ഉപഭോക്തൃ തർക്ക പരിഹാര കമ്മീഷൻ പ്രസിഡണ്ട് കെ.മോഹൻദാസ് മുഖ്യാതിഥിയായിരുന്നു. മഞ്ചേരി നഗരസഭാ ചെയർമാൻ അബ്ദുൾ മജീദ് വല്ലാഞ്ചിറ, അഡ്വ.പി.എ.പൗരൻ ,അഡ്വ.ഷീബ സാമുവൽ, ശിവദാസൻ മേലാറ്റൂർ, സുജീർ പത്തപിരിയം എന്നിവർ പ്രസംഗിച്ചു.
