ന്യൂഡൽഹി: ദേശീയ ഗീതമായ വന്ദേമാതരം ആലപിക്കുന്നതുമായി ബന്ധപ്പെട്ട് കേന്ദ്ര സർക്കാർ പുതിയ മാർഗരേഖ പുറത്തിറക്കി. ഔദ്യോഗിക ചടങ്ങുകളിലും വിദ്യാഭ്യാസ സ്ഥാപനങ്ങളിലുമുള്ള പരിപാടികളിൽ വന്ദേമാതരം ആലപിക്കുമ്പോൾ ആദരസൂചകമായി എഴുന്നേറ്റ് നിൽക്കണം. എന്നാൽ സിനിമ പ്രദർശനത്തിന് മുൻപോ ശേഷമോ തിയേറ്ററുകളിൽ വന്ദേമാതരം ആലപിച്ചാൽ കാണികൾ എഴുന്നേറ്റ് നിൽക്കണമെന്നത് നിർബന്ധമല്ലെന്ന് ആഭ്യന്തര മന്ത്രാലയം വ്യക്തമാക്കി.
ദേശീയ ഗാനം ജനഗണമനയ്ക്ക് നിലവിലുള്ള പ്രോട്ടോക്കോളുകൾ വന്ദേമാതരത്തിനും ബാധകമാക്കുന്നതിന്റെ ഭാഗമായാണ് പുതിയ നിർദ്ദേശങ്ങൾ. ജനങ്ങൾ വിനോദത്തിനായി എത്തുന്ന ഇടങ്ങളായ സിനിമാ തിയേറ്ററുകൾക്ക് പ്രത്യേക ഇളവ് അനുവദിച്ചിരിക്കുകയാണ്. അതേസമയം, വന്ദേമാതരത്തിന് ദേശീയ ഗാനത്തിന് തുല്യമായ പദവി നൽകണമെന്ന ആവശ്യം വിവിധ കോടതികളിൽ പരിഗണനയിലിരിക്കെ, ഇതുമായി ബന്ധപ്പെട്ട നിയമഭേദഗതികൾ സർക്കാർ ആലോചിച്ചുവരികയാണെന്നും അറിയിച്ചിട്ടുണ്ട്.
