മാനന്തവാടി: തിരുനെല്ലി ക്ഷേത്ര സന്ദര്ശനത്തോടെ മാനന്തവാടി നിയോജക മണ്ഡലം തിരഞ്ഞെടുപ്പ് പ്രചാരണങ്ങള്ക്ക് തുടക്കം കുറിച്ച് എന്ഡിഎ സ്ഥാനാര്ത്ഥി പി. ശ്യാംരാജ്. തിരുനെല്ലിയിലെ പ്രസിദ്ധനായ വെള്ളാന് വൈദ്യരെ അദ്ദേഹത്തിൻ്റെ വീട്ടില് എത്തി ശ്യാം സന്ദര്ശിച്ചു. തുടര്ന്ന് തവിഞ്ഞാല് പഞ്ചായത്തിലെ തറവാടുകളായ കാത്തലോട്ട്, വെണ്മണി, കാവില്, എടമന. എടത്തന, കുനിയിമ്മല്, മുതുവട്ടില്, ഇല്ലത്തമൂല, ഇടലക്കുനി, പുക്കോട് എന്നി തറവാടുകളും ശ്യാം സന്ദര്ശിച്ചു. വന് സ്വീകരണമാണ് തറവാടുകളില് സ്ഥാനാര്ത്ഥിക്ക് നല്കിയത്. മന്ത്രിയുടെ മണ്ഡലമായിട്ടും വികസന പ്രവർത്തനങ്ങൾ നടപ്പിലാക്കാത്ത പ്രദേശമാണിവ. എംഎല്എ എന്ന നിലയിലും മന്ത്രി എന്ന നിലയിലും ഒ.ആർ കേളു പൂര്ണ്ണ പരാജയമാണെന്നതിൻ്റെ തെളിവാണ് ഇതെന്നും ശ്യാംരാജ് ആരോപിച്ചു. കാര്ഷിക മേഖലയെ ആശ്രയിച്ച് മാത്രം മുന്നോട്ട് പോകുന്ന പ്രദേശമായിട്ടും വനാര്തിര്ത്തികളില് സുരക്ഷയൊരുക്കാന് മന്ത്രി എന്ന നിലയിലും എംഎല്എ എന്ന നിലയിലും ഒ.ആര്. കേളുവിന് കഴിഞ്ഞിട്ടില്ല. വികസന മുരടിപ്പില് നിന്ന് മാനന്തവാടിയെ മുന്നോട്ട് നയിക്കാന് എന്ഡിഎക്ക് മാത്രമേ സാധിക്കൂ എന്നും തറവാട്ടുകാര് പറഞ്ഞു.
