കേരളത്തിലെ കോൺഗ്രസ് രാഷ്ട്രീയം ഇന്ന് സമാനതകളില്ലാത്ത ഒരു പ്രതിസന്ധിയിലൂടെയാണ് കടന്നുപോകുന്നത്. അധികാരം കൈപ്പിടിയിലായെന്ന് ഉറപ്പായ നിമിഷം മുതൽ പാർട്ടിക്കുള്ളിൽ ഉടലെടുത്ത മുഖ്യമന്ത്രി പദത്തെച്ചൊല്ലിയുള്ള തർക്കം ഇപ്പോൾ പരസ്യമായ പോരിലേക്ക് വഴിമാറിയിരിക്കുന്നു. എ.ഐ.സി.സി സംഘടനാ ജനറൽ സെക്രട്ടറി കെ.സി. വേണുഗോപാൽ കേരളത്തിൻ്റെ മുഖ്യമന്ത്രി കസേര ലക്ഷ്യമിട്ട് നടത്തുന്ന നീക്കങ്ങളാണ് ഈ തർക്കങ്ങളുടെ കേന്ദ്രബിന്ദു. ദൽഹിയിലെ സ്വാധീനം ഉപയോഗിച്ച് സംസ്ഥാന രാഷ്ട്രീയത്തിൽ പിടിമുറുക്കാനുള്ള അദ്ദേഹത്തിൻ്റെ ശ്രമം കേരളത്തിലെ കരുത്തരായ നേതാക്കളായ വി.ഡി. സതീശൻ, രമേശ് ചെന്നിത്തല, കെ. സുധാകരൻ എന്നിവരെ വലിയ രീതിയിൽ ചൊടിപ്പിച്ചിരിക്കുകയാണ്.
തിരഞ്ഞെടുപ്പിനെ മുന്നിൽ നിന്ന് നയിച്ച പ്രതിപക്ഷ നേതാവ് വി.ഡി. സതീശനെ അപ്രസക്തനാക്കി കൊണ്ട്, ഹൈക്കമാൻഡിൻ്റെ പേരിൽ അധികാരം പിടിച്ചെടുക്കാനുള്ള നീക്കമാണ് വേണുഗോപാൽ നടത്തുന്നത്. ഇത് പാർട്ടിയുടെ താഴെത്തട്ടിലുള്ള പ്രവർത്തകർക്കിടയിലും വലിയ അതൃപ്തി ഉണ്ടാക്കിയിട്ടുണ്ട്. തങ്ങളെ തഴഞ്ഞ് കെ.സി. വേണുഗോപാൽ ഏകപക്ഷീയമായി മുന്നോട്ട് പോയാൽ കടുത്ത തീരുമാനങ്ങളിലേക്ക് നീങ്ങുമെന്ന സൂചനയാണ് വി.ഡി. സതീശനും രമേശ് ചെന്നിത്തലയും നൽകുന്നത്. മുതിർന്ന നേതാക്കളെ പാടെ അവഗണിച്ചുകൊണ്ട് ഹൈക്കമാൻഡ് ഒരു തീരുമാനം എടുത്താൽ, അത് പാർട്ടിയുടെ പിളർപ്പിലേക്കോ പ്രമുഖ നേതാക്കളുടെ രാജിയിലേക്കോ നയിച്ചേക്കാം എന്ന ആശങ്ക രാഷ്ട്രീയ നിരീക്ഷകർ പങ്കുവെക്കുന്നു.
ജനകീയ അടിത്തറയുള്ള നേതാക്കളെ ഒതുക്കി നോമിനേഷൻ രാഷ്ട്രീയം നടപ്പിലാക്കാൻ ശ്രമിച്ചാൽ കേരളത്തിൽ കോൺഗ്രസ് വലിയ വില നൽകേണ്ടി വരുമെന്ന് ഉറപ്പാണ്. ഗ്രൂപ്പ് വൈര്യം മറന്ന് നേതാക്കൾ ഒന്നിച്ച് നിൽക്കേണ്ട സമയത്ത്, മുഖ്യമന്ത്രി കസേരയ്ക്കായി നടക്കുന്ന ഈ വടംവലി കോൺഗ്രസിൻ്റെ ഭാവിയെ തന്നെ ചോദ്യം ചെയ്യുന്നതാണ്. അണിയറയിലെ ഈ രാഷ്ട്രീയ നാടകങ്ങൾ മറനീക്കി പുറത്തുവരുമ്പോൾ, പാർട്ടിയിലെ ഐക്യം തകരാതെ മുന്നോട്ട് കൊണ്ടുപോകാൻ ഹൈക്കമാൻഡിന് കഴിയുമോ എന്നതാണ് രാഷ്ട്രീയ കേരളം ഉറ്റുനോക്കുന്ന പ്രധാന ചോദ്യം. നേതാക്കളുടെ വ്യക്തിപരമായ താല്പര്യങ്ങൾ പാർട്ടിയുടെ നിലനിൽപ്പിന് ഭീഷണിയാകുന്ന കാഴ്ചയാണ് ഇപ്പോൾ കേരളം കണ്ടുകൊണ്ടിരിക്കുന്നത്.
