ന്യൂഡൽഹി: ഇന്ത്യയുടെ ആദ്യ സ്വകാര്യ ഭ്രമണപഥ വിക്ഷേപണ റോക്കറ്റായ വിക്രം-1 വിജയകരമായി വിക്ഷേപിച്ചതിന് പിന്നാലെ സ്കൈറൂട്ട് എയ്റോസ്പേസ് ടീമിനെ പ്രധാനമന്ത്രി നരേന്ദ്ര മോദി അഭിനന്ദിച്ചു. ഇന്ത്യയുടെ ബഹിരാകാശ യാത്രയിലെ നിർണായക നാഴികക്കല്ലാണ് ഈ നേട്ടമെന്ന് അദ്ദേഹം വിശേഷിപ്പിച്ചു.
വിക്ഷേപണത്തിന് ശേഷം സ്കൈറൂട്ട് എയ്റോസ്പേസ് സംഘവുമായി സംസാരിച്ച പ്രധാനമന്ത്രി, രാജ്യത്തിൻ്റെ ബഹിരാകാശ മേഖലയിൽ സ്വകാര്യ മേഖലയിലെ വർധിച്ചുവരുന്ന പങ്കാളിത്തം പുതിയ സാധ്യതകൾ തുറക്കുകയും നവീകരണത്തിന് വേഗം പകരുകയും ചെയ്യുന്നുവെന്ന് പറഞ്ഞു.
ഇന്ത്യയുടെ ബഹിരാകാശ രംഗത്തിൻ്റെ വളർച്ചയ്ക്കും സാങ്കേതിക മികവിനും ഈ വിജയം പുതിയ കരുത്ത് പകരുന്നതാണെന്നും അദ്ദേഹം അഭിപ്രായപ്പെട്ടു.
ഈ നേട്ടം രാജ്യത്തെ അനേകം യുവാക്കളെ വലിയ സ്വപ്നങ്ങൾ കാണാനും നിർഭയമായി പുതുമകൾ സൃഷ്ടിക്കാനും പ്രചോദിപ്പിക്കുമെന്ന് സാമൂഹിക മാധ്യമമായ എക്സിൽ പങ്കുവെച്ച സന്ദേശത്തിൽ പ്രധാനമന്ത്രി പറഞ്ഞു. ചരിത്രവിജയം കൈവരിച്ച സ്കൈറൂട്ട് എയ്റോസ്പേസ് ടീമിന് അദ്ദേഹം ആശംസകളും അറിയിച്ചു.
