ന്യൂഡൽഹി: കേന്ദ്ര റിസർവ് പൊലീസ് സേനയുടെ (സിആർപിഎഫ്) റൈസിങ് ഡേയുടെ ഭാഗമായി പ്രധാനമന്ത്രി നരേന്ദ്ര മോദി സേനയിലെ എല്ലാ ഉദ്യോഗസ്ഥർക്കും ജവാൻമാർക്കും ആശംസകൾ നേർന്നു. അചഞ്ചലമായ ധൈര്യവും കർത്തവ്യനിഷ്ഠയും കൊണ്ടാണ് സിആർപിഎഫ് രാജ്യത്തിന് മാതൃകയായതെന്ന് അദ്ദേഹം പറഞ്ഞു.
രാജ്യത്തിൻ്റെ ആഭ്യന്തര സുരക്ഷ ഉറപ്പാക്കുന്നതിലും പ്രതിസന്ധി ഘട്ടങ്ങളിൽ ജനങ്ങളെ സഹായിക്കുന്നതിലും സിആർപിഎഫ് എപ്പോഴും രാജ്യതാൽപര്യത്തിന് മുൻഗണന നൽകിയിട്ടുണ്ടെന്ന് പ്രധാനമന്ത്രി സാമൂഹിക മാധ്യമമായ എക്സിൽ പങ്കുവെച്ച സന്ദേശത്തിൽ വ്യക്തമാക്കി.
മാവോയിസ്റ്റ് ഭീഷണി ഇല്ലാതാക്കുന്നതിൽ സേന നടത്തിയ പ്രവർത്തനങ്ങൾ ഏറെ ശ്രദ്ധേയമാണെന്നും അതിലൂടെ നിരവധി പ്രദേശങ്ങളിൽ സമാധാനവും വികസനവും ഉറപ്പാക്കാൻ സാധിച്ചതായും അദ്ദേഹം ചൂണ്ടിക്കാട്ടി.
രാജ്യസുരക്ഷയ്ക്കായി ആത്മാർത്ഥമായി സേവനം അനുഷ്ഠിക്കുന്ന സിആർപിഎഫ് ഉദ്യോഗസ്ഥരുടെയും ജവാൻമാരുടെയും സമർപ്പണത്തിനും സേവനത്തിനും പ്രധാനമന്ത്രി നന്ദി രേഖപ്പെടുത്തി.
