കൊൽക്കത്ത: പശ്ചിമ ബംഗാളിലെ റിജിനഗർ നിയമസഭാ ഉപതെരഞ്ഞെടുപ്പിൽ നിന്ന് സ്ഥാനാർത്ഥിയെ പിൻവലിച്ച് ഇടതുമുന്നണി ഘടകകക്ഷിയായ ആർഎസ്പി. പാർട്ടിയുടെ പരമ്പരാഗത തിരഞ്ഞെടുപ്പ് ചിഹ്നമായ ‘ചട്ടുകവും പിക്കാസും’ അനുവദിക്കാത്തതിനെ തുടർന്നാണ് തീരുമാനം.
ഒക്ടോബർ ആറിനാണ് റിജിനഗർ ഉപതെരഞ്ഞെടുപ്പ് നടക്കുന്നത്. നാമനിർദേശ പത്രികകളുടെ സൂക്ഷ്മ പരിശോധനയ്ക്ക് ശേഷം പരമ്പരാഗത ചിഹ്നം ഉപയോഗിക്കാനാകില്ലെന്നും പകരം ‘ബക്കറ്റ്’ ചിഹ്നത്തിൽ മത്സരിക്കണമെന്നും തിരഞ്ഞെടുപ്പ് കമ്മീഷൻ അറിയിച്ചതായി ആർഎസ്പി നേതാവ് മനോജ് ബന്ദോപാധ്യായ പറഞ്ഞു.
സാങ്കേതിക പ്രശ്നം ചൂണ്ടിക്കാട്ടിയാണ് പരമ്പരാഗത ചിഹ്നം അനുവദിക്കാത്തതെന്നും ഇതേത്തുടർന്നാണ് സ്ഥാനാർത്ഥിയെ പിൻവലിക്കാൻ തീരുമാനിച്ചതെന്നും അദ്ദേഹം വിശദീകരിച്ചു.
സ്ഥാനാർത്ഥിയുടെ പേര് ഇലക്ട്രോണിക് വോട്ടിങ് മെഷീനിൽ തുടരുമെങ്കിലും ഉപതെരഞ്ഞെടുപ്പിൽ ആർഎസ്പി മത്സരിക്കില്ലെന്നും ബന്ദോപാധ്യായ വ്യക്തമാക്കി.
