ന്യൂഡൽഹി: ഭരണത്തലവനായി 25 വർഷം പൂർത്തിയാക്കിയതിന് ആശംസകൾ നേർന്ന ഗ്രനേഡ, ട്രിനിഡാഡ് ആൻഡ് ടൊബാഗോ, എത്യോപ്യ പ്രധാനമന്ത്രിമാർക്ക് പ്രധാനമന്ത്രി നരേന്ദ്ര മോദി നന്ദി അറിയിച്ചു.
ഗ്രനേഡ പ്രധാനമന്ത്രി ഡിക്കൺ മിച്ചലിൻ്റെ ആശംസകൾക്ക് നന്ദി അറിയിച്ച മോദി, ഇന്ത്യയും ഗ്രനേഡയും തമ്മിലുള്ള സൗഹൃദത്തിന് വലിയ പ്രാധാന്യം നൽകുന്നതായി പറഞ്ഞു. ഇരു രാജ്യങ്ങളും തമ്മിലുള്ള അടുത്ത ബന്ധം കൂടുതൽ ശക്തിപ്പെടുത്താൻ ആഗ്രഹിക്കുന്നുവെന്നും അദ്ദേഹം വ്യക്തമാക്കി.
ട്രിനിഡാഡ് ആൻഡ് ടൊബാഗോ പ്രധാനമന്ത്രി കമല പെർസാദ്-ബിസ്സെസ്സറിന്റെ ആശംസകൾക്കും മോദി നന്ദി അറിയിച്ചു. ഇന്ത്യയും ട്രിനിഡാഡ് ആൻഡ് ടൊബാഗോയും തമ്മിലുള്ള സൗഹൃദം പുതിയ ഉയരങ്ങളിലേക്ക് വളരുകയാണെന്നും വരും വർഷങ്ങളിൽ പങ്കാളിത്തം കൂടുതൽ ശക്തിപ്പെടുത്താനാകുമെന്ന ആത്മവിശ്വാസമുണ്ടെന്നും അദ്ദേഹം പറഞ്ഞു.
എത്യോപ്യൻ പ്രധാനമന്ത്രി അബി അഹമ്മദ് അലിയുടെ ആശംസകൾക്ക് നന്ദി അറിയിച്ച മോദി, മറ്റൊരു കാലയളവിലേക്ക് പ്രധാനമന്ത്രിയായി ചുമതലയേറ്റ അദ്ദേഹത്തിന് ആശംസകളും നേർന്നു. കഴിഞ്ഞ ഡിസംബറിലെ എത്യോപ്യ സന്ദർശനവും അടുത്തിടെ ന്യൂഡൽഹിയിൽ അബി അഹമ്മദുമായി നടത്തിയ കൂടിക്കാഴ്ചയും മോദി അനുസ്മരിച്ചു.
എത്യോപ്യയുമായുള്ള തന്ത്രപ്രധാന പങ്കാളിത്തത്തിന് ഇന്ത്യ വലിയ പ്രാധാന്യം നൽകുന്നതായും സഹകരണവും സൗഹൃദവും കൂടുതൽ ആഴത്തിലാക്കാൻ അബി അഹമ്മദുമായി അടുത്ത് പ്രവർത്തിക്കുമെന്നും മോദി വ്യക്തമാക്കി.
