വാരണാസി: അരവിന്ദ് ലിമിറ്റഡിന്റെ പുതിയ വസ്ത്രനിർമാണ യൂണിറ്റ് പ്രധാനമന്ത്രി നരേന്ദ്ര മോദി ഞായറാഴ്ച വാരണാസിയിൽ ഉദ്ഘാടനം ചെയ്തു. സന്ദർശനത്തിനിടെ യൂണിറ്റിലെ വനിതാ ജീവനക്കാരുമായി അദ്ദേഹം സംവദിച്ചു.
ഉത്തർപ്രദേശ് ഗവർണർ ആനന്ദിബെൻ പട്ടേൽ, മുഖ്യമന്ത്രി യോഗി ആദിത്യനാഥ് എന്നിവരും പ്രധാനമന്ത്രിക്കൊപ്പമുണ്ടായിരുന്നു.
ആധുനിക നിർമാണരീതികൾക്ക് പ്രാധാന്യം നൽകുന്ന യൂണിറ്റ് പ്രാദേശികമായി കൂടുതൽ തൊഴിലവസരങ്ങൾ സൃഷ്ടിക്കുമെന്നും പ്രത്യേകിച്ച് സ്ത്രീകൾക്ക് തൊഴിൽ ലഭ്യമാക്കുമെന്നും ഔദ്യോഗിക പ്രസ്താവനയിൽ അറിയിച്ചു. പ്രദേശത്തിന്റെ സാമ്പത്തിക വളർച്ചയ്ക്കും യൂണിറ്റ് സംഭാവന നൽകും.
അന്താരാഷ്ട്ര ഉപഭോക്താക്കളുമായി ബന്ധമുള്ള ഈ നിർമാണകേന്ദ്രം വാരണാസിയിൽ ഉൽപ്പാദിപ്പിക്കുന്ന വസ്ത്രങ്ങൾ ആഗോള വിപണിയിലെത്തിക്കാനും സഹായിക്കും.
സ്ത്രീകളുടെ നേതൃത്വത്തിലുള്ള ഈ സംരംഭം വനിതാ ശാക്തീകരണത്തിനും സ്ത്രീകൾ നയിക്കുന്ന വികസനത്തിനുമുള്ള സർക്കാരിന്റെ പ്രതിബദ്ധതയാണ് വ്യക്തമാക്കുന്നതെന്നും പ്രസ്താവനയിൽ പറയുന്നു.
