കോഴിക്കോട്: പിഎസ്‌സി പരീക്ഷാ ക്രമക്കേടുമായി ബന്ധപ്പെട്ട കേസിൽ ആദ്യ അറസ്റ്റ്. മുൻ ഡെപ്യൂട്ടി സെക്രട്ടറി പി. സതീഷിനെ കോഴിക്കോട് വീട്ടിൽനിന്ന് പ്രത്യേക അന്വേഷണ സംഘം (എസ്ഐടി) അറസ്റ്റ് ചെയ്തു. കേസിലെ മറ്റൊരു പ്രതിയായ പരീക്ഷാ വിഭാഗം അഡീഷണൽ സെക്രട്ടറി ആർ. ഹരി ഒളിവിലാണ്.
പിഎസ്‌സിയിൽ പരീക്ഷാ വിഭാഗത്തിന്റെ ചുമതല വഹിച്ചിരുന്ന സതീഷിനായിരുന്നു വിവാദ പരീക്ഷയുടെ മൂല്യനിർണയ ചുമതലയും അദ്ദേഹത്തിനായിരുന്നു. കഴിഞ്ഞ വർഷമാണ് അദ്ദേഹം വിരമിച്ചത്.
പരീക്ഷാ ക്രമക്കേടിൽ ഉന്നത ഉദ്യോഗസ്ഥർക്ക് പങ്കുണ്ടോയെന്നതടക്കം എസ്ഐടി അന്വേഷിച്ചുവരികയാണ്. ഇതുമായി ബന്ധപ്പെട്ട നിർണായക തെളിവുകൾ ലഭിച്ചതായാണ് വിവരം. പിഎസ്‌സി ചെയർമാൻ എം. ആർ. ബൈജുവിനെ ഐജി അജിതാ ബീഗത്തിന്റെ നേതൃത്വത്തിൽ ക്രൈംബ്രാഞ്ച് ആസ്ഥാനത്ത് ചോദ്യം ചെയ്യും.
വില്ലേജ് ഫീൽഡ് അസിസ്റ്റന്റ്, ഫിഷറീസ് എക്സ്റ്റൻഷൻ ഓഫീസർ പരീക്ഷകളിലെ ക്രമക്കേടുകളെക്കുറിച്ചും അന്വേഷണം പുരോഗമിക്കുകയാണ്. അസിസ്റ്റന്റ് മോട്ടോർ വെഹിക്കിൾ ഇൻസ്പെക്ടർ പരീക്ഷാ ക്രമക്കേട് പരാതിയിലും കേസെടുക്കാൻ നീക്കമുണ്ട്. നേരത്തെ മൂന്ന് പിഎസ്‌സി അംഗങ്ങളെ ചോദ്യം ചെയ്ത അന്വേഷണ സംഘം, മറ്റൊരു അംഗത്തെയും ചോദ്യം ചെയ്യാനിരിക്കുകയാണ്. കേസിൽ കൂടുതൽ കേസുകൾ രജിസ്റ്റർ ചെയ്യാനും എസ്ഐടി നീക്കം നടത്തുന്നുണ്ട്.
