ന്യൂഡൽഹി: രാജ്യത്തെ മത്സ്യബന്ധന മേഖലയ്ക്ക് 2015 മുതൽ വിവിധ പദ്ധതികളിലൂടെയും പരിപാടികളിലൂടെയും 39,272 കോടി രൂപയുടെ നിക്ഷേപം നടത്തി കേന്ദ്ര സർക്കാർ. ഉൽപ്പാദനത്തിൽ മാത്രം ശ്രദ്ധ കേന്ദ്രീകരിച്ചിരുന്ന മേഖലയെ സാങ്കേതികവിദ്യാധിഷ്ഠിതവും മൂല്യവർധിതവുമായ സാമ്പത്തിക മേഖലയാക്കി മാറ്റുകയാണ് ലക്ഷ്യം.
ഏകദേശം 11,099 കിലോമീറ്റർ തീരപ്രദേശവും 24 ലക്ഷം ചതുരശ്ര കിലോമീറ്ററോളം വിസ്തൃതിയുള്ള പ്രത്യേക സാമ്പത്തിക മേഖലയുമാണ് ഇന്ത്യയ്ക്കുള്ളത്. ഈ മേഖലയിലെ സമുദ്ര മത്സ്യബന്ധന സാധ്യത 58.6 ലക്ഷം മെട്രിക് ടണ്ണായി കണക്കാക്കുന്നു. ഏകദേശം 50 ലക്ഷം മത്സ്യത്തൊഴിലാളികളുടെ ഉപജീവനമാർഗമായ മത്സ്യബന്ധന മേഖല രാജ്യത്തിന്റെ ഭക്ഷ്യസുരക്ഷ, പോഷകാഹാരം, തൊഴിൽ, വരുമാനം എന്നിവയിലും നിർണായക പങ്കുവഹിക്കുന്നു.
ആഗോളതലത്തിൽ മത്സ്യബന്ധന-അക്വാകൾച്ചർ ഉൽപ്പാദന രംഗത്തെ മുൻനിര രാജ്യങ്ങളിലൊന്നാണ് ഇന്ത്യ. 2025–26 സാമ്പത്തിക വർഷത്തിൽ രാജ്യത്തിന്റെ സമുദ്രോൽപ്പന്ന കയറ്റുമതി 73,890 കോടി രൂപയിലെത്തി. ദേശീയ സമ്പദ്‌വ്യവസ്ഥയിലും ആഗോള സമുദ്രോൽപ്പന്ന വ്യാപാരത്തിലും ഈ മേഖലയുടെ പ്രാധാന്യം വർധിക്കുന്നതിന്റെ സൂചനയാണിത്.
സാങ്കേതികവിദ്യയുടെ ഉപയോഗം, മൂല്യവർധിത ഉൽപ്പന്നങ്ങളുടെ വികസനം, മത്സ്യത്തൊഴിലാളികളുടെ സാമ്പത്തിക പുരോഗതി എന്നിവയ്ക്ക് പ്രാധാന്യം നൽകിയാണ് മേഖലയുടെ നവീകരണത്തിന് കേന്ദ്രം ലക്ഷ്യമിടുന്നത്.
