കൊച്ചി: ബലാത്സംഗക്കേസിൽ എംഎൽഎയും സിനിമാ താരവുമായ എം. മുകേഷിന് എറണാകുളം പ്രിൻസിപ്പൽ സെഷൻസ് കോടതി നൽകിയ മുൻകൂർ ജാമ്യത്തിനെതിരെ അപ്പീൽ നൽകേണ്ടെന്ന് സർക്കാർ തീരുമാനിച്ചു. ഹൈക്കോടതിയിൽ അപ്പീൽ നൽകുമെന്ന് മുൻപ് തീരുമാനിച്ചിരുന്നെങ്കിലും എസ്ഐടി നൽകിയ കത്ത് പ്രോസിക്യൂഷൻ തിരിച്ചയച്ചു. അപ്പീലിന് സാധ്യതയില്ലെന്ന് വിശദീകരിച്ചാണ് മറുപടി നൽകുന്നത്.
സർ‍ക്കാര്‍ മുൻകൂർ ജാമ്യം റദ്ദാക്കാൻ തീരുമാനിച്ചിരുന്നെങ്കിലും, ഇപ്പോൾ അതിനു വഴിയില്ലെന്ന് പ്രഖ്യാപിച്ചു. സെഷൻസ് കോടതി മുൻകൂർ ജാമ്യം നൽകിയ ഉത്തരവ് വിചാരണയെ ബാധിക്കുമെന്ന് സര്‍ക്കാര്‍ നേരത്തെ ചൂണ്ടിക്കാട്ടിയിരുന്നുവെങ്കിലും, അത് അപ്പീൽ ചെയ്യാൻ ഇനി തയ്യാറാകുന്നില്ല.
മുന്‍കൂര്‍ ജാമ്യം ലഭിച്ചതിന് ശേഷം മുകേഷ് പ്രതികരിച്ചത് വലിയ ശ്രദ്ധ പിടിച്ചുപറ്റി. “സത്യം ചെരുപ്പിട്ട് വരുമ്പോഴേക്കും കള്ളം ലോകം ചുറ്റി കഴിഞ്ഞേക്കും” എന്നായിരുന്നു മുകേഷിന്റെ പ്രതികരണം. സത്യം വൈകിയെങ്കിലും തെളിയും എന്നും നിയമ പോരാട്ടം തുടരുമെന്നും അദ്ദേഹം വ്യക്തമാക്കി.
ഓഗസ്റ്റ് 26-നാണ് നടി, സിനിമാ രംഗത്തെ മുകേഷടക്കമുള്ള ഏഴ് പേരുടെ പേരിൽ പരാതിയുയർത്തിയത്. മരട് പൊലീസാണ് പരാതി സ്വീകരിച്ച് കേസ് രജിസ്റ്റർ ചെയ്തത്. ഐപിസി 354 പ്രകാരമാണ് മുകേഷിനെതിരെ കേസ് എടുത്തിരിക്കുന്നത്.
സർക്കാരിന്റെ തീരുമാനം ഇപ്പോൾ ബലാത്സംഗ കേസുമായി ബന്ധപ്പെട്ട ചർച്ചകളിൽ പുതിയ വഴിത്തിരിവാണ്.
