തിരുവനന്തപുരം: പാറശാലയില് കാമുകന് ഷാരോണിനെ കഷായത്തില് വിഷം കലര്ത്തി കൊലപ്പെടുത്തിയ കേസില് പ്രതിയായ ഗ്രീഷ്മ കുറ്റക്കാരിയെന്ന് നെയ്യാറ്റിന്കര അഡീഷണല് സെഷന്സ് കോടതി കണ്ടെത്തി. ഗൂഢാലോചനയില് പ്രതിയായിരുന്ന അമ്മ സിന്ധുവിനെ തെളിവുകളുടെ അഭാവത്തില് വെറുതെ വിട്ടു. ഗ്രീഷ്മയുടെ അമ്മാവന് നിര്മ്മല് കുമാര് നായര് തെളിവ് നശിപ്പിക്കാന് സഹായിച്ചതിനും കുറ്റക്കാരനാണെന്ന് കോടതി വിധിച്ചു. പ്രതികളുടെ ശിക്ഷ നാളെ വിധിക്കും.
നെയ്യാറ്റിന്കര അഡീഷണല് സെഷന്സ് കോടതി ജഡ്ജി എ. എം. ബഷീര് ആണ് വിധി പ്രസ്താവിച്ചത്. 2022 ഒക്ടോബര് 14ന് നടന്ന സംഭവമാണ് ഈ കേസിനാസ്പദമായത്. ഷാരോണ്-ഗ്രീഷ്മ ബന്ധം വര്ഷങ്ങളായുള്ളതായിരുന്നു. എന്നാല്, മറ്റൊരാളുമായി വിവാഹം നിശ്ചയിച്ചതോടെ, ഷാരോണിനെ ഒഴിവാക്കാനാണ് ഗ്രീഷ്മ കൊലപാതകം ആസൂത്രണം ചെയ്തത്.
ആദ്യം പാരസെറ്റാമോള് കലര്ത്തിയ ജൂസ് നല്കിയെങ്കിലും ഷാരോണ് ദേഹാസ്വാസ്ഥ്യമുണ്ടാക്കുകയൊഴികെ രക്ഷപ്പെട്ടു. പിന്നീട് പളുകിലെ വീട്ടിലേക്ക് വിളിച്ചുവരുത്തി കീടനാശിനി കലര്ത്തിയ കഷായം നല്കി. ശാരീരിക അവശത അനുഭവപ്പെട്ട ഷാരോണിനെ ആശുപത്രിയില് പ്രവേശിപ്പിച്ചെങ്കിലും 11 ദിവസം കഴിഞ്ഞ് അദ്ദേഹം മരണപ്പെടുകയായിരുന്നു.
2023 ജനുവരി 25ന് ഗ്രീഷ്മക്കെതിരായ കുറ്റപത്രം സമര്പ്പിച്ച കേസില് ഫോറന്സിക് ഡോക്ടര് നല്കിയ ശാസ്ത്രീയ തെളിവുകളാണ് പ്രധാനമായതെന്ന് അന്വേഷണ സംഘം അറിയിച്ചു.
