ലഖ്നൗ: മഹാകുംഭമേളയെക്കുറിച്ച് തെറ്റിദ്ധരിപ്പിക്കുന്ന ഉള്ളടക്കം പ്രചരിപ്പിച്ചതിന് 140 സോഷ്യൽ മീഡിയ അക്കൗണ്ടുകള്ക്കെതിരെ കേസ് രജിസ്റ്റർ ചെയ്തു. ഇതിനകം 13 എഫ്ഐആറുകൾ ഫയൽ ചെയ്തതായി മഹാകുംഭമേള ഡെപ്യൂട്ടി ഇൻസ്പെക്ടർ ജനറൽ ഓഫ് പൊലീസ് വൈഭവ് കൃഷ്ണ സ്ഥിരീകരിച്ചു.
2025 ഫെബ്രുവരി 26-ന് മഹാശിവരാത്രി ഉത്സവം നടക്കുന്ന സാഹചര്യത്തിൽ സുരക്ഷയും ക്രമസമാധാനവും കർശനമായി പാലിക്കുമെന്ന് പൊലീസ് ഉറപ്പു നൽകി. ഗതാഗത തടസ്സങ്ങൾ ഒഴിവാക്കുന്നതിനും വലിയ ജനക്കൂട്ടത്തെ നിയന്ത്രിക്കുന്നതിനും കർശന നടപടികൾ സ്വീകരിക്കുമെന്ന് അദ്ദേഹം അറിയിച്ചു.
അയോധ്യ ധാം റെയിൽവേ സ്റ്റേഷനിൽ സുരക്ഷാ ക്രമീകരണങ്ങളും ജനക്കൂട്ട നിയന്ത്രണ നടപടികളും നടപ്പിലാക്കിയതായി പൊലീസ് വ്യക്തമാക്കി. ട്രെയിൻ എത്തുമ്പോൾ മാത്രം ഭക്തരെ പ്ലാറ്റ്ഫോമിലേക്ക് അനുവദിക്കും. സുരക്ഷയ്ക്കായി 350ലധികം പൊലീസുകാരെ വിന്യസിച്ചിട്ടുണ്ടെന്നും, ബാരിക്കേഡുകൾ സ്ഥാപിച്ചിട്ടുണ്ടെന്നും അധികൃതർ അറിയിച്ചു.
ഇതുവരെ പ്രയാഗ്രാജിൽ 8.773 ദശലക്ഷം ഭക്തർ മഹാകുംഭസ്നാനം നടത്തിയതായി ഉത്തർപ്രദേശ് സർക്കാരിന്റെ ഇൻഫർമേഷൻ വിഭാഗം അറിയിച്ചു.
