തിരുവനന്തപുരം: സംസ്ഥാനത്ത് അടുത്ത മൂന്ന് ദിവസം ഇടിമിന്നലോട് കൂടിയ ശക്തമായ മഴയ്ക്ക് സാധ്യതയുണ്ടെന്ന് കാലാവസ്ഥ വകുപ്പ് അറിയിച്ചു. ഇന്ന് പത്തനംതിട്ട, ഇടുക്കി ജില്ലകളിലും ശനിയാഴ്ച പാലക്കാട്, മലപ്പുറം, വയനാട് ജില്ലകളിലും ഞായറാഴ്ച മലപ്പുറം, വയനാട് ജില്ലകളിലും ഒറ്റപ്പെട്ട ശക്തമായ മഴ ലഭിക്കുമെന്ന് കാലാവസ്ഥ വകുപ്പ് അറിയിച്ചു. ഇതിന്റെ ഭാഗമായി ഈ ജില്ലകളിൽ യെല്ലോ അലര്ട്ട് പ്രഖ്യാപിച്ചിട്ടുണ്ട്. 24 മണിക്കൂറിനുള്ളില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കാമെന്നാണ് മുന്നറിയിപ്പ്.
അതേസമയം, സംസ്ഥാനത്ത് കടുത്ത ചൂട് തുടരുകയാണ്. കൊല്ലത്തെ കൊട്ടാരക്കരയില് അള്ട്രാ വയലറ്റ് സൂചിക 11 ആയി രേഖപ്പെടുത്തിയതിനാൽ റെഡ് അലര്ട്ട് പ്രഖ്യാപിച്ചു. അള്ട്രാവയലറ്റ് സൂചിക 11ന് മുകളിലായാല് അതീവ ഗുരുതരമായ സാഹചര്യമാണെന്ന് കാലാവസ്ഥ വകുപ്പ് അറിയിച്ചു.
കോന്നി, ചങ്ങനാശേരി, ചെങ്ങന്നൂര്, മൂന്നാര്, തൃത്താല, പൊന്നാനി എന്നിവിടങ്ങളില് ഓറഞ്ച് അലര്ട്ടും കളമശേരി, ഒല്ലൂര്, ബേപ്പൂര്, മാനന്തവാടി, ധര്മ്മടം എന്നിവിടങ്ങളില് യെല്ലോ അലര്ട്ടും പ്രഖ്യാപിച്ചിട്ടുണ്ട്. പകല് 10 മണി മുതല് 3 മണി വരെ നേരിട്ട് സൂര്യപ്രകാശം ഒഴിവാക്കണമെന്നും അധികൃതർ മുന്നറിയിപ്പ് നല്കിയിട്ടുണ്ട്.
