ന്യൂഡല്ഹി: ഓപ്പറേഷന് സിന്ദൂര് ആക്രമണത്തിന് ശേഷം സാമൂഹ്യമാധ്യമങ്ങളിൽ നിരീക്ഷണം ശക്തമാക്കാൻ സംസ്ഥാനങ്ങളെ കേന്ദ്ര ആഭ്യന്തര മന്ത്രാലയം നിർദേശിച്ചു. സാമൂഹ്യമാധ്യമങ്ങളിലെ രാജ്യവിരുദ്ധ പോസ്റ്റുകൾക്കെതിരെ ശക്തമായ നടപടി സ്വീകരിക്കാനും കേരളം അടക്കമുള്ള സംസ്ഥാനങ്ങൾക്കു ആഭ്യന്തരമന്ത്രാലയം നിർദ്ദേശം നല്കി.
സാമൂഹ്യമാധ്യമങ്ങളിലെ പാകിസ്ഥാന് അനുകൂല ഹാന്ഡിലുകളില് നിന്ന് വരുന്ന വ്യാജവാര്ത്തകളും ദേശവിരുദ്ധ പ്രചാരണങ്ങളും തടയാന് എല്ലാ സംസ്ഥാനങ്ങള്ക്കും നിര്ദേശം നല്കിയിട്ടുണ്ട്. തെറ്റായ വിവരങ്ങള് പ്രചരിപ്പിക്കുന്നതിനെതിരെ അടിയന്തര നടപടി സ്വീകരിക്കാനും ആഭ്യന്തര മന്ത്രാലയം പറഞ്ഞു.
ആക്രമണങ്ങള് സംബന്ധിച്ച തെറ്റായ വിവരങ്ങള് പാകിസ്ഥാന് അക്കൗണ്ടുകള് വഴി പ്രചരിക്കുന്നതായി റിപ്പോര്ട്ടുകളുണ്ടായിരുന്നു. ഇത്തരം അക്കൗണ്ടുളില് പലതും വിദേശത്ത് നിന്നാണ് പ്രവര്ത്തിക്കുന്നത്.
സംസ്ഥാനങ്ങള് തദ്ദേശ സര്ക്കാരുകള്, സായുധ സേനകള് എന്നിവയുമായി ഏകോപനം ശക്തമാക്കണമെന്നും കേന്ദ്രം ആവശ്യപ്പെട്ടിട്ടുണ്ട്. പ്രത്യേകിച്ച് പ്രശ്ന ബാധിത പ്രദേശങ്ങളുമായി ആശയവിനിമയ ബന്ധങ്ങള് ശക്തമാക്കണമെന്നും നിര്ദേശമുണ്ട്.
