തിരുവനന്തപുരം: ആരോഗ്യ വിപണിയിലേക്ക് മിൽമയുടെ വലിയ ചുവട്. പ്രോട്ടീൻ സമ്പുഷ്ടമായ ആദ്യ ഉൽപ്പന്നമായ ‘ന്യൂട്രിലെവൽ’ ഉൾപ്പെടെ മൂന്ന് പുതിയ ഉൽപ്പന്നങ്ങളാണ് മിൽമ വിപണിയിൽ അവതരിപ്പിച്ചത്.
ന്യൂട്രിലെവലിന്റെ വിപണനോദ്ഘാടനം മന്ത്രി ജെ ചിഞ്ചുറാണി, മില്മ ചെയര്മാന് കെ എസ് മണിക്ക് നല്കി നിര്വഹിച്ചു. പ്രായഭേദമന്യേ എല്ലാവർക്കും ഉപയോഗിക്കാവുന്ന പോഷകസമൃദ്ധവും ഗുണമേൻമയേറിയതുമായ ഉൽപ്പന്നമാണ് ‘ന്യൂട്രിലെവൽ’.
കായികരംഗത്ത് സജീവരായവർ, ആരോഗ്യസംരക്ഷണത്തിൽ ശ്രദ്ധ പുലർത്തുന്നവർ, പ്രായമായവർ, വളർച്ചയുടെ ഘട്ടത്തിലുള്ള കുട്ടികൾ, ശാരീരികമായി ദുര്ബലരായവർ, രോഗപ്രതിരോധശേഷി കുറഞ്ഞവർ, പ്രമേഹരോഗികൾ എന്നിവർക്കെല്ലാം ഏറെ പ്രയോജനകരമാകുന്ന രീതിയിലാണ് ഇത് തയ്യാറാക്കിയിരിക്കുന്നത്.
കഫേ മോക്ക, കോള്ഡ് കോഫി എന്നി മില്ക്ക്ഷേക്കുകളും ചടങ്ങില് പുറത്തിറക്കി. 2030ഓടെ 10,000 കോടി രൂപയുടെ വിറ്റുവരവുള്ള സ്ഥാപനമായി മാറുകയാണ് മിൽമയുടെ ലക്ഷ്യമെന്ന് മന്ത്രി വ്യക്തമാക്കി. ലാഭത്തിന്റെ 85 ശതമാനവും ക്ഷീരകർഷക ക്ഷേമത്തിനായി ക്ഷീര സഹകരണ സംഘങ്ങൾ വഴി ചെലവഴിക്കുന്നുണ്ടെന്നും അവർ കൂട്ടിച്ചേർത്തു.
