സൗദി അറേബ്യയുടെ വിവിധ ഭാഗങ്ങളെ ലക്ഷ്യം വെച്ച മിസൈല്-ഡ്രോണ് ആക്രമണങ്ങളെ പരാജയപ്പെടുത്തി വ്യോമപ്രതിരോധസേന. ബുധനാഴ്ച പുലര്ച്ചെയാണ് സൗദി അറേബ്യയിലെ തലസ്ഥാനമായ റിയാദ്, അല് ഖര്ജ്, കിഴക്കന് പ്രവിശ്യ എന്നിവിടങ്ങളില് ജനവാസ കേന്ദ്രങ്ങളേയും തന്ത്രപ്രധാന മേഖലകളേയും ലക്ഷ്യം വെച്ച മിസൈല് ആക്രമണത്തെ വ്യോമപ്രതിരോധ സേന ആകാശത്തുവെച്ച് തന്നെ തകര്ത്തത്.
അതീവ സുരക്ഷാ മേഖലയായ റിയാദിലെ എംബസി ഡിസ്ട്രിക്ട് ലക്ഷ്യം വെച്ച രണ്ട് ഡ്രോണുകളെ പ്രതിരോധ സേന വെടിവെച്ചിട്ടു. പിന്നാലെ വന്ന മറ്റൊരു ഡ്രോണ് കൂടി സംഘം നിഷ്ക്രിയമാക്കിയെന്ന് പ്രതിരോധ മന്ത്രാലയ വക്താവ് മേജര് ജനറല് തുര്ക്കി അല് മാലിക്കി അറിയിച്ചു.
അല് ഖര്ജ് മേഖലയിലെ അമീര് സുല്ത്താന് എയര്ബേസ് ലക്ഷ്യമാക്കിയാണ് ബാലിസ്റ്റിക് മിസൈല് വന്നത്. മിസൈല് ആകാശത്ത് വെച്ച് തന്നെ തകര്ക്കാന് കഴിഞ്ഞതായി അധികൃതര് വ്യക്തമാക്കി. ആക്രമണ സാധ്യത മുന്കൂട്ടി കണ്ടുകൊണ്ട് ഖര്ജില് സിവില് ഡിഫന്സ് നേരത്തെ അടിയന്തര ജാഗ്രതാ നിര്ദ്ദേശം പുറപ്പെടുവിച്ചിരുന്നു. നിലവില് അടിയന്തര സാഹചര്യങ്ങളില്ലെന്നും അധികൃതര് സ്ഥിരീകരിച്ചു.
