ഇന്ത്യയിലേക്ക് കൂടുതൽ ഊർജ കയറ്റുമതി നടത്താൻ അമേരിക്ക തയ്യാറാണെന്ന് യുഎസ് സ്റ്റേറ്റ് സെക്രട്ടറി മാർക്കോ റുബിയോ വ്യക്തമാക്കി. ഇന്ത്യയെ “മികച്ച പങ്കാളി”യെന്നാണ് അദ്ദേഹം വിശേഷിപ്പിച്ചത്.
സ്വീഡൻ, ഇന്ത്യ സന്ദർശനങ്ങൾക്ക് മുന്നോടിയായി മിയാമിയിൽ മാധ്യമങ്ങളോട് സംസാരിക്കുകയായിരുന്നു റുബിയോ. ഇന്ത്യ വാങ്ങാൻ തയ്യാറുള്ളത്രയും ഊർജം അമേരിക്ക നൽകാൻ തയ്യാറാണെന്ന് അദ്ദേഹം പറഞ്ഞു.
അമേരിക്ക ഇപ്പോൾ ചരിത്രത്തിലെ ഉയർന്ന ഊർജ ഉൽപാദനവും കയറ്റുമതിയും രേഖപ്പെടുത്തുകയാണെന്നും റുബിയോ ചൂണ്ടിക്കാട്ടി.
ഇന്ത്യ സന്ദർശനത്തിനിടെ ക്വാഡ്രിലേറ്ററൽ സെക്യൂരിറ്റി ഡയലോഗ് രാജ്യങ്ങളിലെ മന്ത്രിമാരുമായി കൂടിക്കാഴ്ച നടത്താനാകുന്നതും സന്ദർശനത്തിൻ്റെ പ്രധാന ഭാഗമാണെന്ന് അദ്ദേഹം വ്യക്തമാക്കി.
ഊർജം, വ്യാപാരം, തന്ത്രപ്രധാന സഹകരണം തുടങ്ങിയ മേഖലകളിൽ ഇന്ത്യ-അമേരിക്ക ബന്ധം കൂടുതൽ ശക്തമാകുന്നതിനിടെയാണ് റുബിയോയുടെ പ്രതികരണം.
