ബെംഗളൂരു: കർണാടകയിലെ പുതിയ മന്ത്രിസഭ രൂപീകരണവുമായി ബന്ധപ്പെട്ട് നിയുക്ത മുഖ്യമന്ത്രി ഡി.കെ. ശിവകുമാറും മുൻ മുഖ്യമന്ത്രി സിദ്ധരാമയ്യയും തിങ്കളാഴ്ച ഡൽഹിയിലേക്ക് പോകും. കോൺഗ്രസ് ഹൈക്കമാൻഡുമായി ഡൽഹിയിൽ നിർണായക ചർച്ചകൾ നടക്കുമെന്നാണ് ലഭിക്കുന്ന വിവരം.
ജൂൺ 3ന് വൈകിട്ട് 4.05ന് ലോക് ഭവൻ പരിസരത്ത് വെച്ചാണ് ശിവകുമാർ മുഖ്യമന്ത്രിയായി സത്യപ്രതിജ്ഞ ചെയ്യുക. ഏതാനും മന്ത്രിമാരും അദ്ദേഹത്തോടൊപ്പം സത്യപ്രതിജ്ഞ ചെയ്യുമെന്നാണ് സൂചന. ശനിയാഴ്ചയാണ് ശിവകുമാറിനെ കോൺഗ്രസ് നിയമസഭാകക്ഷി നേതാവായി ഔദ്യോഗികമായി തെരഞ്ഞെടുത്തത്.
മുഖ്യമന്ത്രി ഉൾപ്പെടെ 34 അംഗ മന്ത്രിസഭയ്ക്കാണ് കർണാടകയിൽ അനുമതിയുള്ളത്. എന്നാൽ മന്ത്രിസ്ഥാനത്തിനായി വലിയ തോതിൽ നേതാക്കൾ രംഗത്തുള്ളതിനാൽ എല്ലാവരെയും തൃപ്തിപ്പെടുത്തുക നേതൃത്വത്തിന് വെല്ലുവിളിയായിരിക്കുകയാണ്.
തന്നോടൊപ്പം എത്ര പേർ സത്യപ്രതിജ്ഞ ചെയ്യുമെന്ന ചോദ്യത്തിന് പാർട്ടി നേതൃത്വം തീരുമാനിക്കുന്നതെല്ലാം നടപ്പാക്കുമെന്നായിരുന്നു ശിവകുമാറിൻ്റെ പ്രതികരണം.
അതേസമയം മന്ത്രിസ്ഥാനത്തിനായുള്ള ചരടുവലികൾ ശക്തമായിട്ടുണ്ട്. മുൻ മന്ത്രിമാരും എം.എൽ.എമാരും ഉൾപ്പെടെ നിരവധി നേതാക്കൾ ഡൽഹിയിലെത്തി ഹൈക്കമാൻഡിന് മുന്നിൽ തങ്ങളുടെ അവകാശവാദങ്ങൾ ഉന്നയിക്കുന്നുണ്ട്. സിദ്ധരാമയ്യ മന്ത്രിസഭയിലെ ചിലർ വീണ്ടും അവസരം തേടുമ്പോൾ ആദ്യമായി മന്ത്രിസ്ഥാനമെന്ന പ്രതീക്ഷയിൽ നിരവധി എം.എൽ.എമാരും രംഗത്തുണ്ട്.
പഴയതും പുതിയതുമായ മുഖങ്ങളുടെ സംയോജനമായിരിക്കും പുതിയ മന്ത്രിസഭയെന്നാണ് സൂചന. പ്രാദേശിക പ്രാതിനിധ്യം, ജാതി സമവാക്യങ്ങൾ, വിവിധ വിഭാഗങ്ങളുടെ താൽപര്യങ്ങൾ എന്നിവ പരിഗണിച്ചായിരിക്കും അന്തിമ തീരുമാനം.
ഒന്നിലധികം ഉപമുഖ്യമന്ത്രിമാരെ നിയമിക്കുമെന്ന അഭ്യൂഹങ്ങളും ശക്തമാണ്. എന്നാൽ മന്ത്രിസഭാ രൂപീകരണവുമായി ബന്ധപ്പെട്ട ചർച്ചകൾ ഇപ്പോഴും തുടരുകയാണെന്ന് പാർട്ടി വൃത്തങ്ങൾ അറിയിച്ചു.
കോൺഗ്രസ് അധ്യക്ഷൻ മല്ലികാർജുൻ ഖാർഗെ മന്ത്രിസഭാ രൂപീകരണവുമായി ബന്ധപ്പെട്ട അന്തിമ നിർദേശം ഇതുവരെ ലഭിച്ചിട്ടില്ലെന്ന് വ്യക്തമാക്കിയിട്ടുണ്ട്.
നിലവിൽ ശിവകുമാർ വഹിക്കുന്ന കെ.പി.സി.സി അധ്യക്ഷ സ്ഥാനത്തേക്കുള്ള പുതിയ നിയമനവും ഡൽഹി ചർച്ചകളിൽ പരിഗണിക്കും. മുതിർന്ന നേതാവും മുൻ മന്ത്രിയുമായ സതീഷ് ജാർക്കിഹോളിയാണ് ഈ സ്ഥാനത്തേക്കുള്ള പ്രധാന പരിഗണനയിലുള്ളത്.
ജൂൺ 18ന് നടക്കുന്ന രാജ്യസഭ, നിയമസഭാ കൗൺസിൽ തെരഞ്ഞെടുപ്പുകളിലെ സ്ഥാനാർത്ഥി നിർണയവും ചർച്ചയാകുമെന്നാണ് വിവരം. നിലവിലെ അംഗബലം കണക്കിലെടുത്താൽ നാല് രാജ്യസഭാ സീറ്റുകളിൽ മൂന്നും ഏഴ് നിയമസഭാ കൗൺസിൽ സീറ്റുകളിൽ അഞ്ചും കോൺഗ്രസ് നേടുമെന്നാണ് പ്രതീക്ഷ.
