ന്യൂഡൽഹി: രാജ്യത്തിൻ്റെ രണ്ടാമത്തെ ഉയർന്ന സമാധാനകാല വീരതാ പുരസ്കാരമായ കീർത്തി ചക്ര ഉൾപ്പെടെ വിവിധ വീരതാ പുരസ്കാരങ്ങൾ രാഷ്ട്രപതി ദ്രൌപതി മുർമു തിങ്കളാഴ്ച വിതരണം ചെയ്തു. സായുധ സേനാംഗങ്ങൾ കാഴ്ചവെച്ച അസാമാന്യ ധൈര്യത്തിനും സേവനനിരതയ്ക്കുമുള്ള അംഗീകാരമായാണ് പുരസ്കാരങ്ങൾ സമ്മാനിച്ചത്.
ഏഴ് കീർത്തി ചക്ര പുരസ്കാരങ്ങളാണ് രാഷ്ട്രപതി സമ്മാനിച്ചത്. ഇതിൽ രണ്ട് പുരസ്കാരങ്ങൾ മരണാനന്തര ബഹുമതികളായിരുന്നു. പുരസ്കാര ജേതാക്കളിൽ ഇന്ത്യൻ വ്യോമസേനയിലെ എയർ കൊമഡോറും ബഹിരാകാശ സഞ്ചാരിയുമായ പ്രശാന്ത് ബാലകൃഷ്ണൻ നായർ ഉൾപ്പെട്ടിട്ടുണ്ട്.
രാഷ്ട്രപതി ഭവനിൽ വെച്ച് നടന്ന പുരസ്കാരദാന ചടങ്ങിൻ്റെ ആദ്യഘട്ടത്തിൽ 15 വീർ ചക്രങ്ങളും (മൂന്ന് മരണാനന്തര ബഹുമതികൾ ഉൾപ്പെടെ) 29 ശൗര്യ ചക്രങ്ങളും (ഒന്ന് മരണാനന്തര ബഹുമതിയായി) രാഷ്ട്രപതി വിതരണം ചെയ്തു.
പ്രതിരോധ സേന, കേന്ദ്ര സായുധ പോലീസ് സേനകൾ, സംസ്ഥാന-കേന്ദ്രഭരണ പ്രദേശങ്ങളിലെ പോലീസ് സേനകൾ എന്നിവയിലെ ഉദ്യോഗസ്ഥർക്കും സേനാംഗങ്ങൾക്കുമാണ് പുരസ്കാരങ്ങൾ സമ്മാനിച്ചത്. കടുത്ത വെല്ലുവിളികളും അപകടസാധ്യതകളും നിറഞ്ഞ സാഹചര്യങ്ങളിൽ കാഴ്ചവെച്ച ധീരതയ്ക്കും ആത്മത്യാഗത്തിനുമുള്ള അംഗീകാരമായാണ് ഈ ബഹുമതികൾ നൽകുന്നത്.
