പ്രധാനമന്ത്രി നരേന്ദ്രമോദി അധ്യക്ഷനാകുന്ന നിതി ആയോഗിൻ്റെ 11-ാമത് ഗവേണിംഗ് കൗൺസിൽ യോഗത്തിൽ തമിഴ്നാട് മുഖ്യമന്ത്രി സി ജോസഫ് വിജയ് സംസ്ഥാനത്തിൻ്റെ പ്രധാന ആവശ്യങ്ങളും പ്രാദേശിക ആശങ്കകളും ഉന്നയിക്കും.
കേന്ദ്ര ഫണ്ട് വിഹിതം, സംസ്ഥാനത്തിൻ്റെ വികസന ആവശ്യങ്ങൾ, അടിസ്ഥാന സൗകര്യ വികസന പദ്ധതികൾക്കുള്ള ധനസഹായം എന്നിവയാണ് മുഖ്യമന്ത്രി യോഗത്തിൽ പ്രധാനമായും ഉന്നയിക്കാൻ സാധ്യതയുള്ള വിഷയങ്ങൾ. സംസ്ഥാനത്തെ സുപ്രധാന അടിസ്ഥാന സൗകര്യ പദ്ധതികൾക്കായി കൂടുതൽ കേന്ദ്രസഹായം അനുവദിക്കണമെന്നും അദ്ദേഹം ആവശ്യപ്പെടുമെന്നാണ് ഔദ്യോഗിക വൃത്തങ്ങൾ നൽകുന്ന വിവരം.
രാജ്യത്തെ വിവിധ സംസ്ഥാനങ്ങളിലെ മുഖ്യമന്ത്രിമാരും കേന്ദ്ര ഭരണകൂടത്തിലെ ഉന്നത ഉദ്യോഗസ്ഥരും പങ്കെടുക്കുന്ന യോഗത്തിൽ വികസന നയങ്ങളും ഭാവി പദ്ധതികളും ചർച്ച ചെയ്യും.
മുഖ്യമന്ത്രിയായി ചുമതലയേറ്റശേഷം നിതി ആയോഗ് ഗവേണിംഗ് കൗൺസിൽ യോഗത്തിൽ വിജയ് ആദ്യമായി പങ്കെടുക്കുന്നുവെന്ന പ്രത്യേകതയും ഇത്തവണത്തെ യോഗത്തിനുണ്ട്.
