ഇന്ത്യ ലോകത്തിന് ഒരു “വിശ്വസ്ത പങ്കാളിയായി” ഉയർന്നുവരുകയാണെന്ന് പ്രധാനമന്ത്രി നരേന്ദ്ര മോദി പറഞ്ഞു. വരും തലമുറകൾക്ക് വളർച്ചയും നവീകരണവും അവസരങ്ങളും സൃഷ്ടിക്കുന്ന മേഖലകളിലാണ് രാജ്യം നിക്ഷേപം നടത്തുന്നതെന്നും അദ്ദേഹം വ്യക്തമാക്കി.
ഫ്രാൻസ് തലസ്ഥാനമായ പാരിസിലെ പ്രമുഖ ഇൻഡോർ വേദികളിലൊന്നായ സാൽ പ്ലെയലിൽ ഇന്ത്യൻ വംശജരെ അഭിസംബോധന ചെയ്ത് സംസാരിക്കുകയായിരുന്നു പ്രധാനമന്ത്രി.
ഇന്ത്യയുടെ വളർച്ച യാത്രയിലെ നിർണായക ഘട്ടമാണ് ഇപ്പോൾ നടക്കുന്നതെന്നും രാജ്യത്തിൻ്റെ ആഗ്രഹങ്ങളും ലക്ഷ്യങ്ങളും പുതിയ ഉയരങ്ങളിലെത്തുകയാണെന്നും അദ്ദേഹം പറഞ്ഞു.
“ഒരു കാലത്ത് രാജ്യങ്ങൾ തമ്മിലുള്ള ബന്ധം വ്യാപാരത്തെ മാത്രം അടിസ്ഥാനമാക്കിയായിരുന്നു. എന്നാൽ ഇന്ന് വ്യാപാരത്തോടൊപ്പം വിശ്വാസവും അത്രതന്നെ പ്രധാനപ്പെട്ട ഘടകമായി മാറിയിരിക്കുകയാണ്,” മോദി പറഞ്ഞു.
സാമ്പത്തിക വളർച്ച, നവീകരണം, തൊഴിൽ അവസരങ്ങൾ, ഭാവി വികസനം എന്നിവ ലക്ഷ്യമിട്ട് വിവിധ മേഖലകളിൽ ഇന്ത്യ വൻ നിക്ഷേപങ്ങൾ നടത്തുന്നുണ്ടെന്നും ആഗോള തലത്തിൽ ഇന്ത്യയുടെ വിശ്വാസ്യതയും സ്വാധീനവും വർധിച്ചുവരികയാണെന്നും അദ്ദേഹം കൂട്ടിച്ചേർത്തു.
