കൊൽക്കത്ത: പ്രധാനമന്ത്രി നരേന്ദ്രമോദി ജൂൺ 20, 21 തീയതികളിൽ പശ്ചിമ ബംഗാൾ സന്ദർശിക്കും. പശ്ചിമബംഗാൾ ദിനാഘോഷത്തിൽ പങ്കെടുക്കുന്നതിനൊപ്പം വിവിധ വികസന പദ്ധതികൾ ഉദ്ഘാടനം ചെയ്യുന്ന പ്രധാനമന്ത്രി കിസാൻ സമ്മാൻ നിധിയുടെ 23-ാം ഗഡു വിതരണം ചെയ്യുകയും ചെയ്യും.
ഹൂഗ്ലി ജില്ലയിലെ താരകേശ്വറിൽ നടക്കുന്ന ചടങ്ങിൽ റെയിൽവേ, കൃഷി, മത്സ്യബന്ധനം, ഗ്രാമവികസനം തുടങ്ങിയ മേഖലകളിലെ വിവിധ പദ്ധതികൾക്ക് തുടക്കമിടും. രാജ്യത്തെ 9.44 കോടി കർഷകരുടെ അക്കൗണ്ടുകളിലേക്ക് ₹18,880 കോടിയിലധികം രൂപയുടെ പിഎം-കിസാൻ ധനസഹായവും വിതരണം ചെയ്യും.
ജൂൺ 21-ന് കൊൽക്കത്തയിൽ നടക്കുന്ന 12-ാമത് അന്താരാഷ്ട്ര യോഗദിനാഘോഷത്തിന് പ്രധാനമന്ത്രി നേതൃത്വം നൽകും. ‘ആരോഗ്യകരമായ വാർധക്യത്തിനായുള്ള യോഗ’ എന്നതാണ് ഇത്തവണത്തെ പ്രമേയം.
തുടർന്ന് ശ്യാമ പ്രസാദ് മുഖർജി തുറമുഖത്ത് തദ്ദേശീയമായി രൂപകൽപന ചെയ്ത് നിർമ്മിച്ച ഐഎൻഎസ് ദുനഗിരി, ഐഎൻഎസ് സൻശോധക്, ഐഎൻഎസ് അഗ്രയ് എന്നീ മൂന്ന് നാവിക കപ്പലുകൾ അദ്ദേഹം രാജ്യത്തിന് സമർപ്പിക്കും. രാജ്യത്തിൻ്റെ സമുദ്ര സുരക്ഷയും നാവിക ശേഷിയും ശക്തിപ്പെടുത്താൻ ഇത് സഹായിക്കുമെന്ന് അധികൃതർ അറിയിച്ചു.
