യുവജനശക്തിയിലും നൈപുണ്യ വികസനത്തിലും നവീകരണത്തിലും ഊന്നൽ നൽകി ഭാവിയിലെ ആഗോള സമ്പദ്വ്യവസ്ഥയെ നയിക്കാൻ ഇന്ത്യ തയ്യാറെടുക്കുകയാണെന്ന് പ്രധാനമന്ത്രി നരേന്ദ്ര മോദി.
പ്രധാനമന്ത്രി വികസിത് ഭാരത് റോസ്ഗാർ യോജനയുടെ ഗുണഭോക്താക്കളെ അഭിസംബോധന ചെയ്ത് സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്. ഇന്ത്യയുടെ ഏറ്റവും വലിയ ശക്തി യുവജനങ്ങളാണെന്നും വരും വർഷങ്ങളിൽ ആഗോള വളർച്ചയ്ക്കും സംരംഭകത്വത്തിനും സാങ്കേതിക പുരോഗതിക്കും നേതൃത്വം നൽകുന്നതിൽ ഇന്ത്യൻ യുവാക്കൾ നിർണായക പങ്കുവഹിക്കുമെന്നും അദ്ദേഹം പറഞ്ഞു.
സ്റ്റാർട്ടപ്പുകൾ, ഡിജിറ്റൽ സേവനങ്ങൾ, നിർമ്മാണ മേഖല, ബഹിരാകാശ സാങ്കേതികവിദ്യ, കൃത്രിമ ബുദ്ധി (AI) തുടങ്ങിയ മേഖലകളിൽ രാജ്യത്ത് വേഗത്തിലുള്ള വളർച്ചയുണ്ടാകുകയാണെന്ന് മോദി ചൂണ്ടിക്കാട്ടി. ഈ മേഖലകൾ ലക്ഷക്കണക്കിന് യുവാക്കൾക്ക് പുതിയ തൊഴിൽ അവസരങ്ങൾ സൃഷ്ടിക്കുകയാണെന്നും അദ്ദേഹം പറഞ്ഞു.
രാജ്യത്തെ എല്ലാ ജില്ലകളിലും വ്യാപിച്ചുകിടക്കുന്ന രണ്ടുലക്ഷത്തിലധികം സ്റ്റാർട്ടപ്പുകൾ ഇന്ന് ഇന്ത്യയിലുണ്ടെന്നും ഇന്ത്യൻ നവീകരണ മേഖലയിലുള്ള ആഗോള വിശ്വാസം നിക്ഷേപത്തിനും തൊഴിൽ സൃഷ്ടിക്കും സാമ്പത്തിക വളർച്ചയ്ക്കും പുതിയ വഴികൾ തുറക്കുകയാണെന്നും പ്രധാനമന്ത്രി വ്യക്തമാക്കി.
21-ാം നൂറ്റാണ്ടിൽ കഴിവുറ്റ മനുഷ്യവിഭവശേഷിയെയും നവീകരണത്തെയും ഉയർന്ന നിലവാരത്തെയും പ്രോത്സാഹിപ്പിക്കുന്ന രാജ്യങ്ങളായിരിക്കും മുന്നിലെത്തുകയെന്നും ആ രംഗത്ത് ഇന്ത്യക്ക് മുൻനിരയിൽ നിൽക്കാൻ കഴിയുമെന്ന ആത്മവിശ്വാസവും അദ്ദേഹം പ്രകടിപ്പിച്ചു.
