ന്യൂഡൽഹി: ആമസോൺ സിഇഒ ആൻഡി ജാസി വ്യാഴാഴ്ച ന്യൂഡൽഹിയിൽ പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തി. ഇന്ത്യയിലെ നിക്ഷേപവും തൊഴിൽ അവസരങ്ങളും ഉൾപ്പെടെയുള്ള വിഷയങ്ങളാണ് ചർച്ചയായത്.
ഇന്ത്യയിൽ ആമസോൺ പ്രഖ്യാപിച്ച 48 ബില്യൺ ഡോളറിൻ്റെ റെക്കോർഡ് നിക്ഷേപത്തെ പ്രധാനമന്ത്രി മോദി സ്വാഗതം ചെയ്തു. ഈ നിക്ഷേപം രാജ്യത്തെ യുവാക്കൾക്ക് പുതിയ തൊഴിലവസരങ്ങൾ സൃഷ്ടിക്കുമെന്നും ലോകമെമ്പാടുമുള്ള കമ്പനികൾക്ക് ഇന്ത്യയിൽ നിക്ഷേപം നടത്താനുള്ള വർധിച്ചുവരുന്ന താൽപര്യത്തിൻ്റെ തെളിവാണിതെന്നും അദ്ദേഹം പറഞ്ഞു.
കൂടിക്കാഴ്ചയുടെ വിവരം എക്സ് (X) പ്ലാറ്റ്ഫോമിലൂടെ പങ്കുവെച്ച പ്രധാനമന്ത്രി, ഇന്ത്യ ആഗോള നിക്ഷേപകർക്കുള്ള പ്രധാന ലക്ഷ്യസ്ഥാനമായി മാറിക്കൊണ്ടിരിക്കുകയാണെന്നും ഡിജിറ്റൽ സമ്പദ്വ്യവസ്ഥയിലും സാങ്കേതിക രംഗത്തും രാജ്യത്തിൻ്റെ വളർച്ച കൂടുതൽ വിദേശ നിക്ഷേപങ്ങളെ ആകർഷിക്കുകയാണെന്നും വ്യക്തമാക്കി.
