താനെ: റെക്കോർഡ് നേട്ടങ്ങളിലൂടെ ശ്രദ്ധേയനായ നേപ്പാൾ പർവതാരോഹകൻ നിമ റിൻജി ഷെർപ താനെ സന്ദർശിച്ചു. ഞായറാഴ്ച നടന്ന സൗഹൃദ സന്ദർശനത്തിനിടെ തൻ്റെ പർവതാരോഹണ യാത്രയും അനുഭവങ്ങളും അദ്ദേഹം പങ്കുവച്ചു.
പ്രാദേശിക ട്രസ്റ്റ് സംഘടിപ്പിച്ച പരിപാടിയിൽ പങ്കെടുക്കാനെത്തിയതായിരുന്നു അദ്ദേഹം. പിതാവിൽ നിന്നും അമ്മാവനിൽ നിന്നും ചെറുപ്പത്തിൽ ലഭിച്ച പരിശീലനവും പർവതാരോഹണത്തിൻ്റെ ആദ്യപാഠങ്ങളും ചടങ്ങിൽ അദ്ദേഹം ഓർത്തെടുത്തു. ഉയർന്ന പ്രദേശങ്ങളിൽ നേരിട്ട പ്രകൃതിദുരന്തങ്ങളും പ്രതികൂല സാഹചര്യങ്ങളും അദ്ദേഹം വിശദീകരിച്ചു.
ലോകത്തിലെ അഞ്ചാമത്തെ ഉയരം കൂടിയ കൊടുമുടിയായ മൗണ്ട് മകാലു 15-ാം വയസിൽ കീഴടക്കിയ അനുഭവവും ഷെർപ പങ്കുവച്ചു.
2024ൽ 18-ാം വയസിൽ 8,000 മീറ്ററിലധികം ഉയരമുള്ള ലോകത്തിലെ 14 കൊടുമുടികളും കീഴടക്കുന്ന ഏറ്റവും പ്രായം കുറഞ്ഞ പർവതാരോഹകൻ എന്ന റെക്കോർഡും നിമ റിൻജി ഷെർപ സ്വന്തമാക്കിയിരുന്നു.
