ന്യൂഡൽഹി: കോക്രോച്ച് ജനത പാർട്ടി (സി.ജെ.പി) സംഘടിപ്പിച്ച ‘സൻസദ് ചലോ’ പ്രതിഷേധ മാർച്ചിന് മുന്നോടിയായി ജനക്കൂട്ട നിയന്ത്രണത്തിനുള്ള മതിയായ ക്രമീകരണങ്ങൾ ഏർപ്പെടുത്തണമെന്ന് ഡൽഹി പോലീസ് സംഘാടകരോട് ആവശ്യപ്പെടുന്നുവെന്ന് പറയുന്ന വീഡിയോ സമൂഹമാധ്യമങ്ങളിൽ വൈറലായി.
ജൂലൈ 20-ന് നടന്ന പ്രതിഷേധത്തിന് തലേദിവസമായ ജൂലൈ 19-ന് ജന്തർ മന്തറിൽ ചിത്രീകരിച്ചതാണെന്ന് അവകാശപ്പെടുന്ന വീഡിയോയിലാണ് ന്യൂഡൽഹി ഡെപ്യൂട്ടി പോലീസ് കമ്മിഷണർ സച്ചിൻ ശർമ്മ, ജോയിന്റ് പോലീസ് കമ്മിഷണർ ദീപക് പുരോഹിത്, സി.ജെ.പി പ്രതിനിധികളായ സൗരവ് ദാസ് ഉൾപ്പെടെയുള്ളവർ തമ്മിലുള്ള സംഭാഷണം ദൃശ്യമായിരിക്കുന്നത്.
പ്രതിഷേധത്തിൽ വലിയ ജനപങ്കാളിത്തം പ്രതീക്ഷിക്കപ്പെടുന്ന സാഹചര്യത്തിൽ വേദിയിൽ ആവശ്യമായ സന്നദ്ധപ്രവർത്തകരില്ലെന്ന ആശങ്ക പോലീസ് ഉദ്യോഗസ്ഥർ പ്രകടിപ്പിക്കുന്നതായും ജനക്കൂട്ടത്തെ നിയന്ത്രിക്കുന്നതിനായി കൂടുതൽ വോളന്റിയർമാരെ നിയോഗിക്കണമെന്ന് സംഘാടകരോട് നിർദേശിക്കുന്നതായും വീഡിയോയിൽ കേൾക്കാം.സമൂഹമാധ്യമങ്ങളിൽ വ്യാപകമായി പ്രചരിക്കുന്ന ഈ വീഡിയോയുടെ ആധികാരികതയും സംഭാഷണത്തിന്റെ പൂർണ പശ്ചാത്തലവും സ്വതന്ത്രമായി സ്ഥിരീകരിക്കപ്പെട്ടിട്ടില്ല.
