ന്യൂഡൽഹി: സമൂഹത്തിൻ്റെ വളർച്ചയിലും രാജ്യത്തിൻ്റെ ഭാവി രൂപപ്പെടുത്തുന്നതിലും അധ്യാപകർ നൽകുന്ന നിർണായക സംഭാവനയെ അഭിനന്ദിച്ച് പ്രധാനമന്ത്രി നരേന്ദ്ര മോദി. അധ്യാപക ദിനം അധ്യാപകരുടെ സേവനങ്ങളെ ആദരിക്കുന്നതിനൊപ്പം മുൻ രാഷ്ട്രപതി ഡോ. എസ്. രാധാകൃഷ്ണനെ അനുസ്മരിക്കാനുള്ള അവസരവുമാണെന്ന് പ്രധാനമന്ത്രി പറഞ്ഞു.
ദേശീയ അധ്യാപക പുരസ്കാര ജേതാക്കളെ വെള്ളിയാഴ്ച ഡൽഹിയിലെ 7, ലോക് കല്യാൺ മാർഗിലെ വസതിയിൽ പ്രധാനമന്ത്രി കൂടിക്കാഴ്ച നടത്തിയിരുന്നു. ഈ കൂടിക്കാഴ്ചയിലെ വിവിധ നിമിഷങ്ങളുടെ ദൃശ്യങ്ങളും അദ്ദേഹം പങ്കുവച്ചു.
അധ്യാപകരുടെ അനുഭവങ്ങളും ആശയങ്ങളും നേരിട്ട് കേൾക്കുന്നതിനൊപ്പം വിദ്യാഭ്യാസ മേഖലയിലെ വിവിധ വിഷയങ്ങളും പ്രധാനമന്ത്രി അവരുമായി ചർച്ച ചെയ്തു. വിദ്യാർത്ഥികളുടെ സമഗ്ര വളർച്ചയ്ക്കും ആത്മവിശ്വാസം വർധിപ്പിക്കുന്നതിനും അധ്യാപകർ വഹിക്കുന്ന പങ്കിനും കൂടിക്കാഴ്ചയിൽ പ്രാധാന്യം നൽകി.
“അധ്യാപക ദിനം സമൂഹത്തിന് അധ്യാപകർ നൽകുന്ന ശക്തമായ സംഭാവനയെ അഭിനന്ദിക്കാനുള്ള ദിനമാണ്. ഡോ. എസ്. രാധാകൃഷ്ണനെ ആദരപൂർവം അനുസ്മരിക്കാനുള്ള ദിനം കൂടിയാണിത്,” പ്രധാനമന്ത്രി എക്സിൽ കുറിച്ചു.
ഇന്ത്യയിൽ എല്ലാ വർഷവും സെപ്റ്റംബർ 5നാണ് അധ്യാപക ദിനം ആചരിക്കുന്നത്. ഡോ. എസ്. രാധാകൃഷ്ണൻ്റെ ജന്മദിനത്തിൻ്റെ സ്മരണയ്ക്കായാണ് ഈ ദിവസം അധ്യാപക ദിനമായി ആചരിക്കുന്നത്.
