ധാരാപുരം: തിരഞ്ഞെടുപ്പ് വാഗ്ദാനങ്ങൾ പാലിക്കുന്നതിൽ ഭരണകക്ഷിയായ തമിഴക വെട്രി കഴകം (TVK) പരാജയപ്പെട്ടെന്നും സംസ്ഥാനത്തെ ക്രമസമാധാനനില മോശമായെന്നും ആരോപിച്ച് തമിഴ്നാട് നിയമസഭയിലെ പ്രതിപക്ഷ നേതാവ് ഉദയനിധി സ്റ്റാലിൻ രംഗത്ത്.
ധാരാപുരത്ത് ഒക്ടോബർ ആറിന് നടക്കാനിരിക്കുന്ന ഉപതിരഞ്ഞെടുപ്പിൽ സ്ഥാനാർത്ഥി എസ്. സുകന്യയ്ക്ക് വേണ്ടി പ്രചാരണം നടത്തുന്നതിനിടെയാണ് ഉദയനിധി സ്റ്റാലിൻ ഭരണകക്ഷിക്കെതിരെ വിമർശനം ഉന്നയിച്ചത്. ഭരണകാര്യങ്ങൾ പരിഹരിക്കുന്നതിന് പകരം ടിവികെ എംഎൽഎമാർ മുഖ്യമന്ത്രി സി. ജോസഫ് വിജയിയെ പുകഴ്ത്തുന്നതിലാണ് കൂടുതൽ ശ്രദ്ധ ചെലുത്തുന്നതെന്ന് അദ്ദേഹം ആരോപിച്ചു.
മറ്റ് രാഷ്ട്രീയ പാർട്ടികളിൽ നിന്നുള്ളവരെ സംശയാസ്പദമായ രീതിയിൽ ടിവികെയിൽ ചേർക്കുകയാണെന്നും ഉദയനിധി ആരോപിച്ചു. ഡെലിവറി ആപ്പിലൂടെ സോഫ ഓർഡർ ചെയ്യുന്നതിന് സമാനമായ രീതിയിലാണ് പാർട്ടിയിലേക്ക് ആളുകളെ എത്തിക്കുന്നതെന്നും അദ്ദേഹം പരിഹസിച്ചു.
സ്ത്രീകൾക്ക് സാമ്പത്തിക സഹായം, സൗജന്യ പാചകവാതക സിലിണ്ടറുകൾ, തൊഴിലില്ലായ്മാ സഹായം, കർഷകരുടെ കാർഷിക വായ്പകൾ പൂർണമായി എഴുതിത്തള്ളൽ തുടങ്ങിയ നിരവധി തിരഞ്ഞെടുപ്പ് വാഗ്ദാനങ്ങൾ ടിവികെ സർക്കാർ നടപ്പാക്കിയിട്ടില്ലെന്നും ഉദയനിധി ആരോപിച്ചു.
ധാരാപുരം നിയമസഭാ മണ്ഡലത്തിലെ ഉപതിരഞ്ഞെടുപ്പ് ഒക്ടോബർ ആറിനാണ് നടക്കുന്നത്.
