ന്യൂഡൽഹി: വിവിധ വിഷയങ്ങളിൽ ചർച്ച നടത്തുന്നതിനായി സഭാംഗങ്ങൾ അവതരിപ്പിക്കുന്ന പ്രമേയങ്ങളെ പ്രധാനമായും മൂന്ന് വിഭാഗങ്ങളായി തിരിക്കാം. മൗലിക പ്രമേയം (Substantive Motion), ബദൽ പ്രമേയം (Substitute Motion), അനുബന്ധ പ്രമേയം (Subsidiary Motion) എന്നിവയാണവ.
മൗലിക പ്രമേയം: പ്രധാനപ്പെട്ട ഒരു വിഷയത്തെക്കുറിച്ച് സ്വതന്ത്രമായി അവതരിപ്പിക്കുന്ന പ്രമേയമാണിത്. രാഷ്ട്രപതിക്കെതിരായ ഇംപീച്ച്‌മെന്റ് പ്രമേയം, മുഖ്യ തിരഞ്ഞെടുപ്പ് കമ്മിഷണറെ നീക്കുന്നതിനുള്ള പ്രമേയം തുടങ്ങിയവ ഇതിന് ഉദാഹരണങ്ങളാണ്.
ബദൽ പ്രമേയം: നിലവിലുള്ള ഒരു പ്രമേയത്തിന് പകരമായി അവതരിപ്പിക്കുന്ന പ്രമേയമാണിത്. സഭ അംഗീകരിച്ചാൽ ഇത് യഥാർത്ഥ പ്രമേയത്തിന് പകരമാകും.
അനുബന്ധ പ്രമേയം: ഒറ്റയ്ക്ക് പ്രത്യേക അർത്ഥമില്ലാത്തതും യഥാർത്ഥ പ്രമേയത്തെയോ സഭയിലെ നടപടികളെയോ പരാമർശിക്കാതെ സഭയുടെ തീരുമാനം വ്യക്തമാക്കാൻ കഴിയാത്തതുമായ പ്രമേയമാണിത്.
