കൊൽക്കത്ത: പശ്ചിമ ബംഗാളിൽ മുൻ തെരഞ്ഞെടുക്കപ്പെട്ട സർക്കാരിനെ പുനഃസ്ഥാപിക്കണമെന്നും ആറുമാസത്തിനകം പുതിയ തെരഞ്ഞെടുപ്പ് നടത്താൻ നിർദേശിക്കണമെന്നും സുപ്രീംകോടതിയോട് ആവശ്യപ്പെട്ട് തൃണമൂൽ കോൺഗ്രസ് എംപി അഭിഷേക് ബാനർജി. ബിജെപി സർക്കാരിന്റെ അധികാരത്തിന്റെ തെരഞ്ഞെടുപ്പ് സാധുതയെ ചോദ്യം ചെയ്താണ് ഡയമണ്ട് ഹാർബർ എംപിയുടെ പ്രതികരണം.
പശ്ചിമ ബംഗാളിലെ വോട്ടർപട്ടികയുടെ പ്രത്യേക തീവ്ര പരിഷ്കരണവുമായി (SIR) ബന്ധപ്പെട്ട് സുപ്രീംകോടതി നടത്തിയ നിരീക്ഷണങ്ങൾക്ക് പിന്നാലെയാണ് അഭിഷേക് ബാനർജി രംഗത്തെത്തിയത്. വോട്ടർമാരുടെ വിവരങ്ങൾ പരിശോധിക്കുന്നതിനായി തെരഞ്ഞെടുപ്പ് കമ്മീഷൻ ഉപയോഗിക്കുന്ന ‘ലോജിക്കൽ ഡിസ്ക്രിപൻസി’ വിഭാഗത്തിന്റെ നിയമസാധുതയിൽ കോടതി ഇതുവരെ അന്തിമവിധി പുറപ്പെടുവിച്ചിട്ടില്ലെന്ന് ബെഞ്ച് വ്യക്തമാക്കി.
ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മാല്യ ബാഗ്ചി, വി മോഹന എന്നിവർ ഉൾപ്പെട്ട ബെഞ്ചാണ് ഇക്കാര്യം വ്യക്തമാക്കിയത്. പശ്ചിമ ബംഗാളിൽ SIR നടപടികൾ നടത്താൻ നേരത്തേ നൽകിയ അനുമതി ഇടക്കാല ക്രമീകരണം മാത്രമായിരുന്നുവെന്നും കോടതി നിരീക്ഷിച്ചു.
ബിഹാറിലെ SIR നടപടികളുമായി ബന്ധപ്പെട്ട കേസിൽ പുറപ്പെടുവിച്ച തീരുമാനം, വോട്ടർപട്ടിക പരിഷ്കരണവുമായി ബന്ധപ്പെട്ട എല്ലാ നിയമപ്രശ്നങ്ങളിലും അന്തിമ തീരുമാനമായിരുന്നില്ലെന്നും ബെഞ്ച് വ്യക്തമാക്കി.
കോടതിയുടെ നിരീക്ഷണങ്ങൾ ചൂണ്ടിക്കാട്ടിയാണ് പശ്ചിമ ബംഗാളിൽ മുൻ സർക്കാരിനെ പുനഃസ്ഥാപിക്കണമെന്നും ആറുമാസത്തിനകം പുതിയ തെരഞ്ഞെടുപ്പ് നടത്തണമെന്നും അഭിഷേക് ബാനർജി ആവശ്യപ്പെട്ടത്. വോട്ടർപട്ടിക പരിഷ്കരണവുമായി ബന്ധപ്പെട്ട നിയമനടപടികൾ സംസ്ഥാനത്ത് തുടരുന്നതിനിടെയാണ് പ്രതികരണം.
