ന്യൂഡൽഹി: ഡോ. വി. നാരായണൻ ഐഎസ്ആർഒയുടെ പുതിയ ചെയർമാനാകും. നിലവിൽ തിരുവനന്തപുരം വലിയമല ലിക്വിഡ് പ്രൊപ്പൽഷൻ സിസ്റ്റംസ് സെന്ററിന്റെ ഡയറക്ടർ ആയ ഡോ. നാരായണൻ, ഡോ. എസ്. സോമനാഥിന്റെ വിരമിക്കൽ ഒഴിവിലേക്കാണ് നിയമിതനായിരിക്കുന്നത്.
ജനുവരി 14ന് പുതിയ ചെയർമാനായി നാരായണൻ ചുമതലയേൽക്കും. ബഹിരാകാശ വകുപ്പ് സെക്രട്ടറി, ബഹിരാകാശ കമ്മിഷൻ ചെയർമാൻ എന്നീ പദവികളും നിർവഹിക്കും.
കന്യാകുമാരി സ്വദേശിയായ ഡോ. നാരായണൻ, റോക്കറ്റ് പ്രൊപ്പൽഷൻ രംഗത്തെ വിദഗ്ധനാണ്. ജി.എസ്.എൽ.വി മാർക്ക്-3 സി25 ക്രയോജനിക് പ്രോജക്ടിന്റെ ഡയറക്ടറായും അദ്ദേഹം സേവനമനുഷ്ഠിച്ചിട്ടുണ്ട്.
ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി ഖരഗ്പൂരിൽ നിന്ന് വിദ്യാഭ്യാസം പൂര്ത്തിയാക്കിയ അദ്ദേഹം 1984-ൽ ഐഎസ്ആർഒയിലേക്ക് ചേർന്നതുമുതൽ വിവിധ പ്രധാന പദവികൾ വഹിച്ചിട്ടുണ്ട്.
രണ്ടുവർഷത്തേക്കുള്ള ഈ നിയമനം ഇന്ത്യൻ ബഹിരാകാശ ഗവേഷണ രംഗത്ത് പുതിയ അധ്യായത്തിന് തുടക്കം കുറിക്കുമെന്ന പ്രതീക്ഷയിലാണ്.
